Pekin mikrobiologiya va epidimiologiya instituti olimlari tomonidan kanalar orqali tarqaladigan hamda asab tizmini zararlaydigan yangi virus aniqlandi.

Yangi virus WELV yoki patogen suv-botqoq virusi deb nomlangan. Bu virus dastlab Xitoy shimolidagi 61 yoshli erkakda aniqlangan. Erkakni Ichki Mo‘g‘uliston parkida kana chaqqan bo‘lgan. Antibiotiklar foyda bermagani va infeksiyani bakteriyalar yuzaga chiqarmaganini ma’lum qilishgan.

Avval WELV virusi uy hayvonlari va odamlarda kuzatilmagan. Tadqiqotchilar 14,6 mingga yaqin kanani yig‘ib, ularni turiga va joylashuviga ko‘ra guruhlarga ajratib tahlil qilishgan. Ushbu guruhlarning deyarli 2 foizi WELV genetik materialiga ijobiy natija bergan.

Kasallik belgilari

Bu virus bilan kasallangan bemorlarda bosh aylanishi, isitma, holsizlik, bosh og‘rig‘i, ko‘ngil aynishi, ich ketishi kabi umumiy alomatlar kuzatilgan. Laboratoriya tahlil natijalariga ko‘ra ko‘plab bemorlarda to‘qimalarning zararlanishi hamda qon ivishidagi belgilar bor.

Hattoki, ushbu virusga chalingan bir bemor hushidan ketgan va komaga tushib qolgan. Bemorning miya va orqa miyani o‘rab turuvchi suyuqligida leykositlar miqdori yuqori bo‘lgan.

Quvonarlisi, olimlar WELV bilan og‘rigan barcha bemorlar bir-ikki hafta ichida sog‘ayib ketganini aytishgan. Ammo, tajriba sichqonlarida o‘tkazilgan tajribalar shuni ko‘rsatganki, virus miya va boshqa a’zolarni zararlab, o‘limga olib kelishi mumkin.

• Lifestyle
• Tibbiyot
• salomatlik