Isroil o‘zining eng yirik savdo hamkori bo‘lgan AQShdan import qilinadigan mahsulotlar uchun bojxona to‘lovlarini bekor qildi. Bu haqda Anadolu agentligi xabar berdi.

Ushbu qaror mamlakat bosh vaziri Binyamin Netanyaxu boshchiligidagi hukumat tomonidan qabul qilingan. Netanyaxu devoni, Moliya vazirligi hamda Iqtisodiyot va sanoat vazirligi qo‘shma bayonot e’lon qilgan. Unga ko‘ra, 1985-yilda AQSh bilan imzolangan erkin savdo bitimi doirasida Isroil hozirda ushbu mamlakatdan import qilinadigan mahsulotlarning 99 foiziga boj solmaydi.

2024-yilda Isroildan AQShga tovarlar eksporti 17,3 mlrd dollar, xizmatlar eksporti esa 16,7 mlrd dollarni tashkil etgan.

“Amerika mahsulotlariga bojxona to‘lovlarini bekor qilish mening hukumatim olib borayotgan bozorni raqobatga ochish, iqtisodiyotni diversifikatsiya qilish va yashash narxini pasaytirishga qaratilgan siyosatining navbatdagi qadami. Bu nafaqat iqtisodiy foyda keltiradi, balki Isroil va AQSh o‘rtasidagi ittifoqni yanada mustahkamlash imkonini ham beradi”, – deya izoh bergan Netanyaxu.

• AQSh
• Bojxona
• Hamkorlik
• Import
• Isroil