Issiqxonachilarga yengillik berish bo‘yicha Prezident qarori imzolandi.

Unga ko‘ra, endilikda issiqxona xo‘jaliklari tabiiy gaz bo‘yicha to‘lovni o‘z vaqtida amalga oshirmagani uchun 6 oy davomida qo‘shimcha ustama (penya) to‘lamaydi.

Qarorda keltirilishicha, ushbu tartib, istisno tariqasida, 2022-yil 1-oktyabrdan 2023-yil 1-aprelgacha amal qiladi.

Bundan tashqari, issiqxona xo‘jaliklari tijorat banklaridan olgan kredit va ularning foizlarini mahsulot pishib-yetilgan davrda to‘lab berishi mumkin bo‘ladi.

Shuningdek, xalqaro moliya institutlari, maqsadli jamg‘armalar hamda Tiklanish va taraqqiyot jamg‘armasi mablag‘lari hisobidan issiqxona xo‘jaliklari va muzlatkichli omborxonalar uchun ajratilgan milliy va xorijiy valyutadagi kreditlarni qaytarish muddatlarini umumiy hisobda 14 yil etib belgilash va imtiyozli davrini 3 yildan 5 yilgacha uzaytirish (muddati o‘tgan asosiy va foiz qarzdorliklarini kredit davriga mutanosib ravishda uzaytirish). Bunda, Tadbirkorlik faoliyatini qo‘llab-quvvatlash davlat jamg‘armasi tomonidan avval taqdim qilingan kafillik va kredit foizlari kompensasiyalari saqlanib qoladi.

Mazkur imtiyozlar issiqxona xo‘jaliklari moliyaviy ahvolini sog‘lomlashtirish va rivojlantirish bo‘yicha respublika ishchi guruhining o‘rganish natijalariga ko‘ra shakllantirilgan ro‘yxat asosida taqdim etiladi.

Shuningdek, issiqxona xo‘jaliklarini aylanma mablag‘ (urug‘lik, ko‘chat, o‘g‘it, kimyoviy vositalar, issiqxona materiallarini sotib olish va isitish xarajatlari uchun) bilan ta’minlash uchun tijorat banklari tomonidan bir yil muddatga olti oylik imtiyozli davr bilan kredit ajratiladi.

Issiqxona xo‘jaliklarida eksportbop mahsulot yetishtirishga talab etiladigan aylanma mablag‘lar uchun xorijiy valyutadagi bank kreditlari Eksportni rag‘batlantirish agentligi mablag‘lari hisobidan yillik 4 foiz stavkada (shundan, bank marjasi 2 foiz) ajratiladi. Bunda, kredit ta’minoti sifatida “O‘zbekinvest” sug‘urta kompaniyasi sug‘urta polisi qabul qilinadi va sug‘urta mukofoti xarajatlarining 75 foizi Eksportni rag‘batlantirish agentligi mablag‘lari hisobidan qoplab beriladi.

• Bank
• Issiqxona
• Kredit
• Prezident
• Qaror
• Tadbirkorlik