Jo Baydenning hayoti saraton sabab keskin o‘zgardi 

AQSHning sobiq prezidenti Joe Biden metastatik prostata saratoni sabab jamoatchilik oldidagi faoliyatini keskin cheklagan. Bu haqda The Washington Post sobiq yordamchilari va Baydenga yaqin manbalarga tayanib xabar berdi.

Ma’lum qilinishicha, 2025-yil may oyida, prezidentlik muddati yakunlanganidan to‘rt oy o‘tib, 83 yoshli Baydenga suyaklarga tarqalgan prostata saratonining tajovuzkor shakli tashxisi qo‘yilgan. Hozirda u radiatsiya va gormonal terapiya kurslarini olmoqda, shuningdek, teri saratoni hujayralarini olib tashlash bo‘yicha Mohs jarrohligini ham boshdan kechirgan.

Manbalarga ko‘ra, davolanish ijobiy kechayotgan bo‘lsa-da, kasallik va muolajalar Baydenni jismonan ancha zaiflashtirgan. Uning kundalik hayoti asosan davolanish, oilasi bilan vaqt o‘tkazish va siyosiy merosini shakllantirish ishlari bilan cheklanmoqda.

Shu yilning 17-noyabr kuni Baydenning yangi memuarlari nashr etilishi rejalashtirilgan. Demokratlar orasida esa uning sog‘lig‘i bilan bog‘liq muhokamalar 2024-yilgi prezidentlik saylovlari atrofidagi bahslarni yana kuchaytirishi mumkinligi haqida xavotirlar bildirilmoqda.

Shuningdek, federal apellyatsiya sudi konservativ Heritage Foundationga maxsus prokuror Baydenni “xotirasi sust keksa odam” deb ta’riflagan audioyozuvlar va transkriptlarni olishga ruxsat berdi.

Maqolada qayd etilishicha, AQSH prezidenti Donald Trump Baydenning yoshi va sog‘lig‘ini bir necha bor tanqid qilgan. Demokratik partiya vakillari esa Trampning sog‘lig‘i ham jamoatchilik e’tiboridan chetda qolmasligi kerakligini ta’kidlamoqda. Oq uy esa Trampning sog‘lig‘i yaxshi ekanini bildirib kelmoqda.