Andijonda o‘zini “prezident oilasiga yaqin” deb tanishtirib, fuqarolarni aldagan guruhga hukm o‘qildi

Andijon viloyatida o‘zini “prezident oilasiga yaqin shaxs” sifatida tanishtirib, fuqarolarning turli masalalarini pul evaziga hal qilib berishni va’da qilgan uyushgan jinoiy guruh a’zolariga sud hukmi chiqarildi.

Sud hujjatlariga ko‘ra, guruhga Sirdaryo viloyatida tug‘ilgan, avval ham firibgarlik va boshqa jinoyatlar uchun bir necha bor sudlangan J.N. rahbarlik qilgan. Guruh tarkibida Andijon va Jizzax viloyatlaridan bo‘lgan bir necha shaxs ham bo‘lgan.

Ular yuqori lavozimga tayinlanishni istagan, davlat buyurtmalari yoki yirik shartnomalarni qo‘lga kiritmoqchi bo‘lgan, shuningdek, yer va sud bilan bog‘liq muammolarini hal etishga urinayotgan fuqarolarni topib, J.N. bilan uchrashtirgan. U esa o‘zini “prezident oilasiga yaqin shaxs” sifatida tanishtirib, masalalarni yuqori lavozimli tanishlari orqali hal qilib berishini aytgan va buning evaziga katta miqdorda pul olgan.

Jinoyat ishida qayd etilishicha:

bir fuqarodan rahbarlik lavozimiga tayinlash va’dasi bilan 25 ming dollar;

tadbirkordan yirik davlat shartnomasini olib berish bahonasida 119,5 ming dollar, shuningdek avtomobil uchun yana 45 ming dollar;

Rossiya fuqarosidan “Yangi Toshkent” loyihasida qurilish ruxsatnomasi va yer ajratish va’dasi bilan 40 ming dollar;

yana bir fuqarodan sud ishini uning foydasiga hal qilib berish uchun 58,4 ming dollar olingan.

Biroq va’da qilingan xizmatlarning hech biri bajarilmagan, olingan mablag‘lar esa shaxsiy ehtiyojlarga sarflangani aniqlangan.

Sud ayblanuvchilarni aybli deb topib, ularga tegishli jazolarni tayinladi. Apellyatsiya sudi ham birinchi instansiya hukmining jazoga oid qismini o‘zgarishsiz qoldirdi.