2026-yil 1-iyuldan O‘zbekistonda fuqarolar hayoti, ijtimoiy himoya, sog‘liqni saqlash, uy-joy va tadbirkorlik sohalariga oid qator muhim o‘zgarishlar kuchga kiradi.

Pensiya va nafaqalar 7 foizga oshiriladi

Prezident farmoniga muvofiq, pensiyalar, nafaqalar hamda “Ijtimoiy reyestr”ga kiritilgan oilalarga bolalar nafaqasi va moddiy yordam to‘lovlari 7 foizga oshiriladi. Yoshga doir eng kam pensiya 983 ming so‘m, nogironlik pensiyasining eng kam miqdori 1 million 83 ming so‘m, pensiyani hisoblashning bazaviy miqdori esa 504 ming so‘m etib belgilanadi.

Nasldor buzoqlar uchun subsidiya beriladi

Sun’iy urug‘lantirish orqali olingan har bir buzoq uchun 500 ming so‘m, embrion ko‘chirib o‘tkazish orqali olingan buzoq uchun esa 700 ming so‘m subsidiya ajratiladi. Shuningdek, 2029-yil 1-yanvargacha xorijdan olib kiriladigan nasldor qoramol, qo‘y va echkilar QQSdan ozod etiladi.

Elektron tijoratda bond omborlari tizimi ishga tushiriladi

2026-yil 1-iyuldan 2028-yil 1-iyulgacha huquqiy eksperiment tariqasida elektron tijorat uchun maxsus bond omborlari faoliyati yo‘lga qo‘yiladi. Ushbu omborlar rezident va norezidentlarga elektron savdo platformalari orqali sotiladigan tovarlarni vaqtincha saqlash imkonini beradi.

Subsidiya mablag‘larini omonatda saqlash imkoniyati yaratiladi

Subsidiya xabarnomasiga ega fuqarolar tijorat banklarida maxsus maqsadli ipoteka omonati hisobvarag‘ini ochib, dastlabki badal uchun ajratilgan mablag‘larni saqlashi va ko‘paytirishi mumkin bo‘ladi.

Toshkentda “Mening uyim” tizimi joriy etiladi

Poytaxtdagi ko‘p kvartirali uylarda umumiy yig‘ilishlar, boshqaruv qarorlari, shartnomalar, hisobotlar va murojaatlar faqat “Mening uyim” elektron tizimi orqali yuritiladi. Mazkur tartib 2027-yildan boshlab butun respublika bo‘ylab joriy etiladi.

Korrupsiya haqida xabar berganlar himoya qilinadi

Korrupsiyaviy holatlar haqida xabar bergan shaxslarga Korrupsiyaga qarshi kurashish agentligi tomonidan himoya orderi beriladi. Shuningdek, “Korrupsiyaga qarshi kurashishga qo‘shgan hissasi uchun” ko‘krak nishoni ta’sis etiladi.

Bepul rejali statsionar tibbiy yordam yo‘lga qo‘yiladi

Davlat tibbiy sug‘urtasi tizimi joriy etilgan tibbiyot muassasalarida fuqarolar elektron navbat asosida bepul rejali statsionar davolanish huquqiga ega bo‘ladi.

Mehnatga layoqatsizlik nafaqasi yangi tartibda to‘lanadi

Rasmiy band bo‘lgan fuqarolarga homiladorlik va vaqtincha mehnatga layoqatsizlik nafaqalari bosqichma-bosqich Ijtimoiy himoya jamg‘armasi tomonidan to‘lab boriladi.

Kvartira to‘lovidan qarzdorlarga elektr uchun to‘lov cheklanadi

Ko‘p kvartirali uylarda yashovchi mulkdorlar har oyning 15-sanasigacha majburiy badallarni to‘lamasa, qarzdorlik bartaraf etilgunga qadar elektr energiyasi uchun to‘lovni amalga oshira olmaydi.

Xarid cheki orqali avtomobil yutib olish imkoniyati yaratiladi

Qoraqalpog‘iston Respublikasi va Xorazm viloyatida xarid cheklarining “Soliq” mobil ilovasi orqali ro‘yxatdan o‘tkazilishi asosida yutuqli o‘yinlar tashkil etiladi. Ishtirokchilar avtomobil va boshqa sovrinlarni yutib olish imkoniyatiga ega bo‘ladi.