Fransiyada kuzatilayotgan anomal jazirama tufayli Parijdagi Eyfel minorasining balandligi taxminan 10 santimetrga oshdi. Bu haqda RTL radiostansiyasi muhandis va me’mor Bertran Lemuan ma’lumotlariga tayanib xabar berdi. Mutaxassisning aytishicha, bu hodisa metallning issiqlik ta’sirida kengayishi bilan bog‘liq. Eyfel minorasi foydalanishga topshirilganida uning balandligi 300 metr bo‘lgan. 2022-yilda esa unga 30 metrlik radioantenna o‘rnatilib, umumiy balandligi 330 metrga yetkazilgan.

“Harorat minus 10 darajadan plyus 40 darajagacha o‘zgarganda, Eyfel minorasi taxminan 10 santimetrga uzayadi. Bu har 10 daraja harorat o‘zgarishiga o‘rtacha 2 santimetrdan to‘g‘ri keladi”, — dedi Bertran Lemuan. Uning ta’kidlashicha, bu o‘zgarish oddiy ko‘z bilan deyarli sezilmaydi va hozircha inshoot uchun hech qanday xavf tug‘dirmaydi. Biroq uzoq yillar davomida metallning muntazam kengayishi va qisqarishi konstruksiyada kuchlanish hosil qilishi mumkin. “Simni bir marta bursangiz, hech narsa bo‘lmaydi. Ammo uni yuz marta bursangiz, zo‘riqish sabab oxir-oqibat uziladi. Metall konstruksiyalarda ham shunga o‘xshash jarayon kuzatiladi”, — deya izoh berdi mutaxassis. Ekspertning qayd etishicha, hozirda Eyfel minorasi tuzilmasiga xavf yo‘q.

Chunki metall faqat juda yuqori — taxminan 1500 °C haroratda eriydi. So‘nggi kunlarda Fransiya va Yevropaning boshqa qator davlatlarida anomal jazirama kuzatilmoqda. Ayrim hududlarda havo harorati 40 °C va undan yuqori darajaga ko‘tarilgan. Mutaxassislar bunday issiqlik to‘lqinlari insonlar salomatligi va infratuzilmaga jiddiy ta’sir ko‘rsatishi mumkinligidan ogohlantirmoqda.