Bosh prokuratura huzuridagi Departamentning bir nechta hududiy bo‘limlari va huquqni muhofaza qiluvchi organlar hamkorligida o‘tkazilgan tezkor tadbirlarda kuchli ta’sir qiluvchi dori vositalarining noqonuniy savdosi fosh etildi.

Jumladan, G‘ijduvon tumanida “S.Ph.” MChJga tegishli dorixonada 25 dona kuchli ta’sir qiluvchi dori vositasi 16,2 mln so‘mga shifokor retseptsiz sotilayotgan vaqtda ashyoviy dalillar bilan ushlangan.

Shayxontohur tumanida “Spark” rusumli avtomobil tekshirilganda, fuqarolar N.F. va I.E. 440 dona kuchli ta’sir qiluvchi dori vositasini keyinchalik sotish maqsadida olib ketayotgani aniqlangan.

Pastdarg‘om tumanida “Sh.Sh.” MChJ dorixonasi sotuvchilari J.Yu. va O.Yu. 300 dona “Benzonal” dori vositasini fuqaroga sotgan vaqtida qo‘lga olingan.

Urganch shahrida esa fuqaro D.Ya.ning xonadonidan 80 dona kuchli ta’sir qiluvchi dori vositasi noqonuniy saqlanayotgani aniqlanib, daliliy ashyo sifatida olingan.

Mazkur holatlar yuzasidan Jinoyat kodeksining 251-1-moddasi bilan jinoyat ishlari qo‘zg‘atilgan. Hozirda tergov harakatlari olib borilmoqda.