Birlashgan Arab Amirliklari (BAA) Eronni Hormuz bo‘g‘ozida neft tankeriga hujum uyushtirishda aybladi. Bu haqda mamlakat Tashqi ishlar vazirligi ma’lum qildi.

Qayd etilishicha, ADNOC kompaniyasiga tegishli tanker bo‘g‘ozdan o‘tayotgan paytda ikki dona dron yordamida hujumga uchragan. Hodisa oqibatida jabrlanganlar haqida ma’lumot berilmagan.

Rasmiylar ushbu harakatni xalqaro dengiz yo‘llarida erkin harakatlanish tamoyillariga zid hamda BMT Xavfsizlik kengashi rezolyutsiyalariga qarshi deb baholagan. Shuningdek, bunday hujumlar mintaqaviy barqarorlik va global energetika xavfsizligiga tahdid solishi ta’kidlangan.

BAA tomoni Erondan bu kabi harakatlarni zudlik bilan to‘xtatishni talab qilgan.

Shu bilan birga, Eron avvalroq AQSH harbiy kemalarining bo‘g‘oz hududiga kirishiga yo‘l qo‘ymaganini bildirgan. Eron manbalariga ko‘ra, dengiz kuchlari “dushman” kemalarni ogohlantirib, hududdan chiqarib yuborgan.

Biroq AQSh bu ma’lumotni rad etdi. AQSh Markaziy qo‘mondonligi (CENTCOM) hech bir harbiy kema zarar ko‘rmaganini ma’lum qilib, mintaqada dengiz qatnovi xavfsizligini ta’minlash operatsiyalari davom etayotganini bildirdi.