AQSH prezidenti Donald Tramp Janubiy Koreyani Hormuz bo‘g‘ozida AQSH boshchiligida olib borilayotgan “Ozodlik missiyasi”ga qo‘shilishga chaqirdi.

U bu haqda o‘zining Truth Social ijtimoiy tarmog‘idagi sahifasida ma’lum qilgan.

Trampning ta’kidlashicha, Eron kuchlari AQSH, Isroil va Eron o‘rtasidagi mojaro bilan bog‘liq bo‘lmagan davlatlarga tegishli kemalarga ham o‘t ochgan. Ular orasida kamida bitta Janubiy Koreya savdo kemasi ham borligi qayd etilgan.

“Ehtimol, Janubiy Koreya uchun ham missiyaga qo‘shilish vaqti kelgandir. Biz yettita ‘tez yurar qayiq’ni yo‘q qildik. Janubiy Koreya kemasidan tashqari, hozirda Hormuz bo‘g‘ozidan o‘tayotgan boshqa kemalar zarar ko‘rmagan”, — deyiladi postda.

Shuningdek, Tramp ushbu masala yuzasidan ertaga AQSH Mudofaa vaziri Pete Hegseth hamda Qo‘shma shtab boshliqlari qo‘mitasi raisi Dan Caine ishtirokida matbuot anjumani o‘tkazilishini ma’lum qilgan.