Uy sharoitida muzdakkina, mazali hamda foydali tort tayyorlab, oila aʼzolaringizga tortiq eting va ularni xursand qiling.

Kerakli masalliqlar:

– Tvorog — 220 gr.

– Smetana – 250gr.

– Suv – 130 ml.

– Shakar – 80 gr.

– Jelatin – 18 gr.

– Vanilin – 1 osh q.

– Apelsin – 1 dona.

– Kivi – 1 dona.

Tayyorlanish jarayoni:

1. Kerakli masalliqlarni oldindan tayyorlab olasiz. Smetananing yogʻlilik darajasi muhim emas, ammo tvorogning yogʻlilik darajasi 5-9% boʻlishi talab etiladi. Mevalarni ham oʻz ixtiyoringizga koʻra tanlashingiz mumkin. 

2. Tvorog, smetana, vanilin va shakarni blender yordamida aralashtirib olasiz.

3. Jelatinga qaynatib sovutilgan suv solib, 15 daqiqaga qoldirasiz.

4. Istalgan shakldagi qolipni tanlab, selofan paket bilan qoplaysiz. Shunda muzlagan tortni ajratib olishingiz oson kechadi.

5. Mevalarni poʻstlogʻidan ajratib, kesib olasiz va qolipga terib chiqasiz.

6. Jelatinni suyuq holga kelguniga qadar past olovda eritib olasiz va tayyor aralashmaga qoʻshasiz.

7. Hosil boʻlgan aralashmani qolipga quyib, ustini selofan bilan yopasiz va 2-3 soatga muzlatgichda qoldirasiz.

8. Muzlagan tort ustidan tarelka yopib, uni toʻnkarasiz va selofan paketni olib tashlaysiz.

Xamir va gaz pechisiz tayyorlangan mazali tort tayyor!

Yoqimli ishtaha!

• Foydali
• Retsept
• qiziqarli