Oliy sud matbuot xizmatining ma’lum qilishicha, 15-avgustda bo‘lib o‘tadigan sud tomonlarning roziligiga ko‘ra, ochiq yoki yopiq tarzda o‘tkaziladi.

Avvalroq sobiq deputat va hozirda Ekologiya vazirining maslahatchisi Rasul Kusherbayev farzandiga aliment to‘lashdan bosh tortayotgani haqidagi xabarlar ijtimoiy tarmoqlarda keng muhokamalarga sabab bo‘lgan edi. Holat bo‘yicha Oliy Sud matbuot xizmati rasmiy munosabat bildirdi.

Qayd etilishicha, Fuqarolik ishlari bo‘yicha Yakkasaroy tumanlararo sudiga 2025-yil 26-iyun kuni arizachi Sh.I. ariza bilan murojaat qilib, qarzdor R.K.dan voyaga yetmagan farzandi ta’minoti uchun sud buyrug‘i chiqarishni so‘ragan.

Mazkur sudning 2025-yil 28-iyundagi sud buyrug‘i bilan bilan arizachi Sh.I.ning arizasi qanoatlantirilgan. Unga ko‘ra qarzdor R.K.dan undiruvchi Sh.I.ning foydasiga bir nafar 2023-yil 5-oktyabr kuni tug‘ilgan M.K. ismli voyaga yetmagan qiz farzandining ta’minoti uchun 2025-yil 28-iyundan boshlab u voyaga yetgunga qadar har oy jami daromadining 1/4 qismi miqdorida aliment undirilishi belgilangan.

Shuningdek, qarzdor R.K.dan undiruvchi Sh.I.ning foydasiga pochta xarajati va qarzdordan davlat foydasiga davlat boji undirilishi belgilangan.

Shundan so‘ng qarzdor R.K. sudning 2025-yil 28-iyundagi sud buyrug‘idan norozi bo‘lib, 2025-yil 21-iyul kunida mazkur buyruqqa nisbatan e’tiroznoma keltirgan.

Sud Fuqarolik protsessual kodeksining 181-moddasiga ko‘ra va boshqa qonuniy talablardan kelib chiqib, ushbu sudning 2025-yil 23-iyuldagi ajrimi bilan R.K.ning aliment undirish haqidagi sud buyrug‘ini bekor qilish haqidagi arizasini qanoatlantirgan.

Shundan so‘ng da’vogar Sh.I. fuqarolik ishlari bo‘yicha Yakkasaroy tumanlararo sudiga 2025-yil 5-avgust kuni javobgar R.K.ga nisbatan aliment undirish haqidagi da’vo arizasi bilan murojaat qilgan.

Ushbu da’vo ariza yuzasidan fuqarolik ishi qo‘zg‘atilib, ish yurituviga qabul qilingan. Fuqarolik ishini sud majlisida ko‘rib chiqish 2025-yil 15-avgust kuniga soat 16:00 ga tayinlangan.

• Aliment
• Rasul Kusherbayev
• Sud