Ijtimoiy tarmoqlar orqali Maktabgacha va maktab ta’limi vazirligining mas’ul xodimi deya ta’kidlanayotgan erkak jinsiy aloqa qilish evaziga maktab direktorligiga tayinlashda yordam berishi haqida audioxabar tarqaldi. Mazkur holat yuzasidan vazirlikning matbuot xizmati rasmiy bayonot bilan chiqib, tizimda ishlovchi ushbu erkak ishdan olinganini aytib o‘tdi.

“Ijtimoiy tarmoqlarda tarqalgan audioyozuvda vazirlik xodimining o‘zaro manfaat evaziga boshqa bir fuqaroga menejerlik sertifikatini olish hamda maktab direktorligiga tayinlashda yordam berishi haqidagi muloqot xabari yuzasidan vazirlik axborot xizmati quyidagilarni ma’lum qiladi:

Ushbu vaziyat ishtirokchisi bo‘lgan vazirlik xodimi lavozimidan ozod etilgan.

Aytish lozimki, vazirlik sohaga doir korrupsion holatlar hamda manfaatlar to‘qnashuviga mutlaqo qarshi.

Shuningdek, tizimda mehnat qilayotgan barcha xodimlarning kasbiy odob-axloq qoidalariga qat’iy rioya etishi tarafdori.

Shu kabi noqonuniy vaziyatlarga yo‘l qo‘ygan xodimlarga nisbatan qonunchilikda belgilangan tartibda qat’iy choralar ko‘rilishi ta’minlanadi” - deya bayonot berdi Maktabgacha va maktab ta’limi vazirligining axborot xizmati rahbari Dilfuza Sobirova.

• Bayonot
• Maktab
• Maktabgacha va maktab ta'limi vazirligi
• axborot