Hozir iyun-avgust oyigacha ayni malinaning pishiqchilik mavsumi hisoblanadi. Bu davrdan foydalanib qolish kerak. Malinani muzlatib qo‘yib, qishda foydalanish ham mumkin. Bu rezavordan turli shirinliklar, murabbo, smuzi, jem kabi desertlar tayyorlash mumkin. Ushbu mevada ko‘plab vitaminlar, minerallar, o‘simlik tolalari va antioksidantlar mavjud.

Malina shamollashda yordam beradi. Ushbu rezavor superfud hisoblanib, turli kasalliklarning oldini olish va davolashda qo‘llanadi. Masalan, malinadagi antioksidantlar va fitonutriyentlar immunitetni oshiradi, salitsil va foliy kislotalari O‘RVIdan tezroq xalos bo‘lishga yordam beradi. Darvoqe, shamollashga qarshi malinali murabbodan choy tayyorlaganda uni qaynoq suvga emas, balki o‘rtacha issiqlikdagi suvga solish lozim, aks holda malinaning foydali xususiyatlari yo‘qoladi.

Qolaversa, qandli diabetning oldini oladi. Malina qand kasalligiga chalinish xavfini kamaytirishi va insulin miqdorini tushirishi mumkinligi olimlar tomonidan aniqlangan. Malina tarkibidagi marganets suyaklar va teri salomatligini ta’minlash uchun zarurdir. Shuningdek, ushbu rezavordagi o‘simlik tolalari 2-toifali qand kasalligi rivojlanishining oldini oladi.

Ko‘z kasalliklarini oldini olish uchun ham ayni muddaodir. Tadqiqotlar shuni ko‘rsatadiki, malinada mavjud bo‘lgan zeaksantin nomli antioksidant ko‘zdagi sariq dog‘ degeneratsiyasi (ko‘rish qobiliyatining yomonlashishiga olib keladigan kasallik) rivojlanish xavfini kamaytirishga yordam beradi. Malinadagi C vitamini katarakta (ko‘z gavharining xira tortishi)dan himoya qiladi.

Shuningdek, ovqat hazm qilishga yordam beradi. Malina o‘simlik tolalariga boy meva bo‘lib, 100 gramm mahsulot 6,5 gramm kletchatkani o‘z ichiga oladi. Ular oshqozon-ichak salomatligini yaxshilaydi, qabziyatning oldini oladi hamda ichaklarda foydali bakteriyalarning ko‘payishiga yordam beradi.

• salomatlik