“RBK”ning xabar berishicha, Meta asoschisi Mark Sukerbergning boyligi Metaverse ishga tushgandan keyin olti barobarga ko‘payib, 200 milliard dollardan oshdi. 

Bloomberg nashrining reytingiga ko‘ra, Sukerberg dunyodagi 500 nafar eng boy odamlar ro‘yxatida 4-o‘ringa ko‘tarildi. Uning boyligi asosan Meta Platforms Inc. aksiyalari rekord darajadagi qimmatlashuvi sababli oshgan. Natijada biznesmenning sof aktivlari qiymati 2 yil ichida olti baravarga ko‘tarilgan.

2024-yil boshidan beri Meta Platforms Inc. aksiyalarining qiymati o‘tgan yilga nisbatan 60 foizga oshgan. 28-sentyabr kuni ular har bir aksiya uchun rekord 568,95 dollarga savdoga qo‘yilgan.

Facebook ijtimoiy tarmog‘i asosida metaolamning yaratilishi 2021-yil iyul oyida e’lon qilingan. O‘sha yilning oktyabrida Instagram, WhatsApp va boshqa xizmatlarga egalik qiluvchi Facebook Inc. nomi Meta nomiga o‘zgartirildi. 

Xo‘sh, Metaolam nima o‘zi? Metaolam — raqamli olamlar to‘plami. Ya’ni, virtual (VR) va kengaytirilgan (AR) reallik texnologiyalaridan foydalanadigan mahsulotdir. Sukerbergning taxminicha, uni ishlab chiqarish yana 5-10 yil davom etishi kerak.

• Meta
• Yangilik