Qozog‘iston poytaxti Ostonada Markaziy Osiyo davlatlarining vakolatli ommaviy axborot vositalari vakillari maslahat yig‘ilishi bo‘lib o‘tdi. Bu haqda Qozog‘iston Madaniyat va axborot vazirligi xabar berdi.

Mazkur tadbirda hamkorlikni mustahkamlash va mintaqaning axborot makonini rivojlantirish masalalari muhokama qilingan. Unda Qozog‘iston, Tojikiston, O‘zbekiston va Qirg‘iziston vakillari ishtirok etishgan.

Qayd etilishicha, yig‘ilishda ommaviy axborot vositalari sohasida global muammolarga qarshi kurashish bo‘yicha birgalikdagi sa’y-harakatlar muhimligi ta’kidlangan.

Ishtirokchilar, shuningdek, mediasavodxonlikni oshirish va soxta xabarlarga qarshi kurashish masalalarini muhokama qilishgan.

Yana bir asosiy masalalardan biri Markaziy Osiyoda yagona axborot makonini yaratish bo‘lgan. Tomonlar axborot xavfsizligi va madaniy almashinuvni mustahkamlash uchun mintaqaviy umumiy telekanal va media platforma yaratish g‘oyalarini ko‘rib chiqqan.

• Markaziy Osiyo