31°
Kechasi 18°
Sud qaroriga ko‘ra, Ilon Maskning “Tesla” kompaniyasini xususiylashtirish uchun mablag‘ ajratgani haqidagi da’vosi yolg‘on ekani tasdiqlandi. Bu haqda Mask ustidan sudga murojaat qilgan “Tesla” investorlariga tayanib, “Reuters” xabar berdi.
San-Fransisko sudi milliarder Ilon Maskning “Tesla” kompaniyasini xususiylashtirishni moliyalashtirish haqiqatda ta’minlangani haqidagi da’vosi haqiqatga to‘g‘ri kelmaydi, deb qaror qilgan.
Qayd etilishicha, sud Maskning bayonotlarini “noto‘g‘ri va chalg‘ituvchi”, deb topgan hamda u ushbu bayonotlarning yolg‘on ekanini bila turib, o‘ylamasdan qaror qilganini qayd etgan.
Sudda sarmoyadorlar Maskning tvitlari “qarama-qarshi va yolg‘on” ma’lumotlarni taqdim etish bo‘yicha ommaviy kampaniya sifatida e’tirof etilishini hamda ularga yetkazilgan zararni qoplashni talab qilmoqda. Ish may oyida sudda ko‘rib chiqiladi. Maskning ta’kidlashicha, u 2018 yilda Tesla aksiyalarini qaytarib sotib olish va uni xususiy kompaniyaga aylantirish uchun yetarli mablag‘ olgan.
Mask va avto kompaniyaning advokati Aleks Spiro ham 16 aprel kuni milliarder 2018 yilda “Tesla”ni xususiylashtirishni ko‘rib chiqayotgani va bu harakat uchun barcha mablag‘ga ega ekanligini aytdi.
Sudga sabab bo‘lgan tvit 2018 yil avgust oyida Ilon Mask tomonidan yozilgan. Unda u “Tesla” aksiyalarini birjadan qaytarib sotib olish rejalarini e’lon qilib, bitim uchun zarur bo‘lgan moliyalashtirish “ta’minlangan”ligini ta’kidlagan. Kompaniyaning xususiylashtirilishi uni har chorakda hisobot taqdim etish zaruratidan xalos qiladi va rahbariyatga aksiyadorlarning umidlari haqida qayg‘urmasdan, xavfliroq va uzoq muddatli loyihalarni amalga oshirish uchun ko‘proq erkinlik berishi mumkin.
Maskning tviti birjada “Tesla” kotirovkalarining oshishiga sabab bo‘lgan. Ammo AQSH Qimmatli qog‘ozlar va birjalar komissiyasi (SEC) milliarderga qarshi sudga murojaat qilib, uni investorlarni chalg‘itayotganlikda ayblab, kompaniya boshqaruvidan chetlashtirishni talab qildi. Natijada milliarder direktorlar kengashi raisi lavozimini tark etdi va 20 million dollar jarima to‘ladi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
