“Cotton Campaign” xalqaro koalitsiyasi o‘zbek paxtasiga nisbatan boykot bekor bo‘lganini e’lon qilgandi. Prezident ushbu qarorni “juda katta imkoniyat, yangi bozorlar” deb baholadi.

Shavkat Mirziyoyev mahalliy ishlab chiqaruvchilar uchun ochilayotgan yangi imkoniyatlarni sanab, “So‘nggi besh yilda qishloq xo‘jaligi sohasidagi islohotlarimiz samarasini berib, ‘Cotton Campaign’ kuni-kecha O‘zbekistonni ‘qora ro‘yxati’dan chiqardi.

Bu ham biz uchun juda katta imkoniyat, yangi bozorlar degani. Buning hisobiga iste’mol mahsulotlarining xomashyosini olib kelib, ularni qayta ishlash orqali qo‘shimcha 1,5 milliard dollarlik mahsulotni bemalol eksport qilsa bo‘ladi”, – deydi Prezident. 

Shu bois xom ashyoni olib kelib, tayyor mahsulot chiqargan va uni chetga sotadigan (bojxona hududida qayta ishlovchi) korxonalarga apreldan boshlab:

- eksportchilar uchun berilayotgan barcha imtiyozlar tatbiq etiladi;
- loyihalari doirasida texnik-iqtisodiy asos, mahsulot sertifikati, bojxona to‘lovlari ta’minoti talab etilmaydi;
- ruxsatnoma berish muddati 3 barobar qisqaradi, 1 yil davomida ishlab kelayotganlariga ruxsatnoma har bir kontraktiga emas, balki korxona faoliyatiga beriladi;
- olib kelgan dastgohlari uchun bojxona bojlari undirilmaydi.

Bu ishlar mavjud 22 ta erkin iqtisodiy zona hududlarida tashkil etiladi. Misol uchun, Urgut erkin iqtisodiy zonasida 440 gektar, Angrenda 430 gektar, Navoiyda 240 gektar, Qo‘qonda 190 gektar, Chustda 120 gektar bo‘sh maydonlar mavjud.

Viloyat hokimlariga ushbu tayyor infratuzilmadan samarali foydalanib, yangi loyihalarni sanoat zonalariga joylashtirish topshirildi. Jumladan:

- Urgutda oziq-ovqat va elektrotexnika mahsulotlari;
- Chustda tayyor kiyim;
- Navoiy va Qo‘qonda maishiy elektrotexnika;
- Bo‘stonliqda farmasevtika, Angren va Chirchiqda maishiy va sanoat kimyo mahsulotlari ishlab chiqarish quvvatlarini joylashtirish zarur.

Shuningdek, Investitsiyalar va tashqi savdo vaziriga ikki hafta muddatda yangi eksport bozorlariga chiqayotgan korxonalarga ajratilayotgan subsidiyalarni ko‘paytirish bo‘yicha taklif kiritish topshirildi.

• Paxta
• Prezident
• Shavkat Mirziyoyev
• boykot