7-mart kuni Nigeriyaning Kaduna shtatida qurollangan shaxslar 227 nafar maktab o‘quvchisini o‘g‘irlab ketishdi. Bu haqda “DW” xabar berdi.

Mahalliy o‘qituvchilarning so‘zlariga tayangan “Reuters” agentligining ma’lum qilishicha, o‘g‘irlash 2021-yildan beri maktabdagi bola o‘g‘irlashlar orasidagi eng yirigidir. Kaduna shtati politsiyasi “Reuters” agentligining odam o‘g‘irlash bo‘yicha izoh berish haqidagi so‘rovlariga javob bermagan.

Qayd etilishicha, jangarilar ertalabki yig‘ilishdan keyin maktabga hujum qilgan. O‘qituvchilardan biri Sani Abdullahining so‘zlariga ko‘ra, o‘rta maktabdan o‘g‘irlanganlar soni 187 nafar, boshlang‘ich maktabdan esa 40 nafarga yaqin. Kuriga shahar kengashi deputati Idris Mayalluraning aytishicha, jangarilar dastlab 100 nafar boshlang‘ich sinf o‘quvchisini qo‘lga olgan, biroq so‘ng bir qismini qo‘yib yuborishgan va ba’zilari qochishga muvaffaq bo‘lishgan.

Shtat gubernatori Uba Sani barcha maktab o‘quvchilarining ozod etilishini ta’minlashga va’da bergan. “Amnesty International” Nigeriya hukumatini bolalarni qutqarib, aybdorlarni javobgarlikka tortishga chaqirgan.

• Jinoyat
• Maktab
• Nigeriya