Uzoq vaqtdan beri oilada ikkinchi farzandlar isyonkorroq bo‘ladi degan qarash mavjud. Tadqiqotchilar ushbu nazariyani tasdiqlovchi ilmiy dalillarni eʼlon qildi.

MIT iqtisodchisi Jozef Doyl tomonidan o‘tkazilgan tadqiqotga ko‘ra, ikkinchi tug‘ilgan bolalar haqiqatan ham isyonkor xatti-harakatlarni namoyon etishga moyil. Bu, ayniqsa, qiz bolalarga nisbatan o‘g‘il bolalarda ikki baravar ko‘proq kuzatiladi.

"Oilada ikkinchi tug‘ilgan bolalarning qamoqqa tushishlari, maktabda o‘qishni to‘xtatib qo‘yishlari va jinoyatga qo‘l urishlari ehtimoli juda katta", deydi u.

Ammo bu yomon xulq-atvor aslida aka-ukalarning aybi bilan bo‘lishi ham mumkin, chunki kichik yoshdagilar o‘zlarining xatti-harakatlarini kattalarga qarab shakllantiradi.

To‘ngich farzand ota-onasining xulq-atvoriga qarab, ikkinchi va undan keyin tug‘ilgan bolalar esa akasi yoki opasining xarakteridan namuna olishadi.

Tadqiqot uchun Doyl Daniya va Florida shtatidagi oilalar haqidagi maʼlumotlarni tahlil qildi. Geografik hudud va muhitda katta farqlar bo‘lishiga qaramay, natijalar deyarli bir xil bo‘lgan.

Ikkinchi farzandlarda o‘qishga qiziqish past, ammo qamoqqa tushish xavfi 20-40 foizga yuqori.

Doylning qo‘shimcha qilishicha, aksariyat ota-onalar birinchi tug‘ilgan chaqaloqlariga ko‘proq vaqt sarflaydi va boshqacha munosabatda bo‘lishadi. Shu sabab ikkinchi farzandlarda isyonkorlik yuqori bo‘lishi mumkin.

• Bolalar
• Oila
• Tarbiya