Oliy Majlis Senati a’zosi, O‘zbekiston Yozuvchilar uyushmasi Farg‘ona viloyati bo‘limi rahbari Enaxon Siddiqova uzoq muddat davom etgan og‘ir xastalikdan so‘ng vafot etdi.

Qayd etilishicha, marhumaning janozasi bugun, 14-yanvar kuni soat 14:00 da uning xonadonida, Farg‘ona tumanidagi Vodil qishlog‘i Sanoat MFYda o‘tkaziladi.

Enaxon Siddiqova 1954-yil 28-avgustda Oltiariq tumanida tug‘ilgan, ta’lim, matbuot va ijod sohalarida turli vazifalarda faoliyat olib borgan. Uzoq yillik samarali mehnat faoliyati davrida jamiyatda ijtimoiy-ma’naviy muhitni sog‘lomlashtirishda faol ishtirok etib kelgan. Fidokorona mehnatlarining e’tirofi sifatida “Do‘stlik”, “El-yurt hurmati” ordenlari bilan mukofotlangan. 2015 yildan shu kunga qadar Oliy Majlis Senati a’zosi edi.

O‘zbekiston ahli “O‘zbekiston xalq shoiri” yuksak unvoni bilan taqdirlangan Enaxon Siddiqovani o‘zbek adabiyotida o‘z o‘rniga ega iste’dodli shoira, Farg‘ona adabiyotining zabardast vakilasi, jonkuyar jamoat arbobi sifatida yaxshi biladi va yuksak qadrlaydi.

Xabardor.uz marhumaning oila a’zolari va yaqinlariga chuqur ta’ziya izhor etadi.

• Farg‘ona
• O'lim
• Senat
• Senator