2024-yilning dastlabki 6 oyida sudlangan shaxslar soni 29 382 nafarni tashkil etib, shundan 10 287 nafar shaxs ozodlikdan mahrum etilgan. Bu haqda O‘zbekiston Respublikasi Oliy sudi xabar berdi.

Unga ko‘ra, joriy yilning birinchi yarmida jinoyat ishlari bo‘yicha sudlar tomonidan 37 179 nafar shaxsga nisbatan 29 086 ta jinoyat ishi ko‘rib chiqilgan. Shulardan 465 nafar shaxs oqlanib, reabilitatsiya qilingan.
Sudlangan shaxslar soni 29 382 nafarni tashkil etib, shundan 10 287 nafar shaxsga ozodlikdan mahrum qilish va 18 579 nafariga boshqa turdagi jazolar tayinlangan.

Sudlangan shaxslarning 26 028 nafari erkak, 3 354 nafari ayol, 11 145 nafari yoshlar (shu jumladan 1 068 nafari voyaga yetmagan) va 1 105 nafari 60 yoshdan oshgan shaxslar.

Shuningdek, 3 432 nafar shaxs ozodlikdan mahrum etish bilan bog‘liq bo‘lmagan jazolar tayinlanishi munosabati bilan sud zalida qamoqdan ozod qilingan, 16 624 nafari jazoni o‘tashdan muddatidan ilgari shartli ozod qilingan, 5 620 nafariga tayinlangan jazosi yengili bilan almashtirilgan va 6 976 nafar shaxsga nisbatan dastlabki tergov organlari tomonidan asossiz ravishda qo‘yilgan moddalar ayblovdan chiqarib tashlangan.

71 nafar shaxsga (yoshlar, ayollar va boshqalar) kafolat xatlari asosida ozodlikdan mahrum qilish bilan bog‘liq bo‘lmagan jazolar tayinlangan.

Hisobot davrida ko‘rilgan jinoyat ishlarning aksariyatini firibgarlik, transport vositalari harakati yoki ulardan foydalanish xavfsizligi qoidalarini buzish, o‘g‘rilik, o‘zlashtirish yoki rastrata yo‘li bilan talon-toroj qilish, hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish, qasddan badanga yengil shikast yetkazish, bezorilik, qasddan badanga o‘rtacha og‘ir shikast yetkazish hamda giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar bilan bog‘liq jinoyatlar tashkil etadi.

Yarashuv institutining samarali qo‘llanilishi natijasida 6 337 nafar shaxs jinoiy javobgarlikdan ozod etilgan.
Apellyatsiya tartibida 6 395 nafar shaxsga nisbatan 4 798 ta jinoyat ishi ko‘rib chiqilgan. 307 nafar shaxsga nisbatan birinchi instansiya sudlari tomonidan chiqarilgan qarorlar bekor qilinib, 1 311 nafar shaxsga nisbatan chiqarilgan sud qarorlari o‘zgartirilgan.

Kassatsiya tartibida 1 636 nafar shaxsga nisbatan 1 493 ta jinoyat ishi ko‘rib chiqilgan. 106 nafar shaxsga nisbatan birinchi instansiya sudlari tomonidan chiqarilgan qarorlar bekor qilinib, 369 nafar shaxsga nisbatan chiqarilgan sud qarorlari o‘zgartirilgan.

Taftish tartibida 2 560 nafar shaxsga nisbatan 2 188 ta jinoyat ishi ko‘rib chiqilgan. 45 nafar shaxsga nisbatan quyi instansiya sudlari tomonidan chiqarilgan qarorlar bekor qilinib, 337 nafar shaxsga nisbatan chiqarilgan sud qarorlari o‘zgartirilgan.

Oliy sudning Jinoyat ishlari bo‘yicha sudlov hay’ati tomonidan taftish tartibida 590 nafar shaxsga nisbatan 504 ta jinoyat ishi ko‘rib chiqilgan. 49 nafar shaxsga nisbatan quyi sudlar tomonidan chiqarilgan qarorlar bekor qilinib, 121 nafar shaxsga nisbatan chiqarilgan sud qarorlari o‘zgartirilgan.

• Oliy sud
• Sud