Joriy yilning 15-fevral kuni O‘zbekiston Respublikasi IIV Jazoni ijro etish departamentining Olmaliqdagi 14-sonli koloniyasidan 21 yoshli mahkum M.P.ning jasadi chiqqan. Bu haqda Inson huquqlari faoli Abdurahmon Tashanov o‘zining Facebook sahifasida ma’lum qilmoqda.

Unga ko‘ra, Farg‘ona shahar Temurmalik ko‘chasida yashovchi marhumning onasi Nigora Qambarova o‘g‘li bilan shu yilning 26-28-yanvar kunlari uzoq muddatli uchrashuvlarda bo‘lgan.

Ta’kidlanishicha, marhum sportchi bo‘lgan va unda hech qanday kasallik bo‘lmagan.

Shuningdek, 21 yoshli fuqaro sportning ushu yo‘nalishida xalqaro turnirlar g‘olibi bo‘lib kelgan. U bolaligidan mazkur sport turi bilan shug‘ullangan. Biror marta sog‘lig‘idan shikoyat qilmagan, unda biror yondosh kasalliklar kuzatilmagan. Marhumning onasi Tashanov bilan suhbatda bezorilikda ayblanib, 3 yilga qamalgan yolg‘iz o‘g‘lining shu yilning avgustida manzil-koloniyaga chiqqani va kelin qidirganini aytgan.

Ammo koloniya ma’muriyatining ta’kidicha, 14-fevral kuni Muhammadqodirda miokrad infarki va pankreatitning og‘ir formasi kuzatilishi oqibatida vafot etgan. Ammo marhumning onasi farzandining badanida qiynoq izlari mavjudligi, elektroshoker iziga o‘xshash chiziqlar borligini iddao qilgan.

“Bizda shubha tug‘dirgan hozircha yagona jihat koloniya ma’muriyatining mahkumning og‘ir ahvolda shifoxonaga yotqizilgani haqida uning yaqinlariga xabar bermaganligidir. Qo‘limizda ekspertiza hujjatlari bo‘lmagani bois mahkumning qiynoqdan o‘lim topganiga dalolat qila olmaymiz. Ammo koloniya ma’muriyatining jasadni yorib, so‘ng yaqinlariga topshirgunicha bo‘lgan jarayonda ularga xabar bermaganligi mudhish xatodir. Chunki onaning ko‘nglida ulkan gumon qoldi, 20 kun avval soppa-sog‘ ko‘rgan norg‘ul bolasining o‘ligini dabdurustdan qo‘liga tutqazishsa, onaning ahvolini tasavvur qilavering”, – deb yozadi Tashanov.

Bundan tashqari, “Qo‘limdagi videolarni tarmoqqa joylashning iloji yo‘q, tarmoqdan foydalanish qoidalarini buzish bo‘ladi. Ammo ularni Ombudsman vakili va jurnalistlarga berdim, chora ko‘rilar degan umidda emasman. Chunki koloniyadan o‘lik chiqishi oddiy holga aylanib qoldi” – deydi u.

• Abdurahmon Tashanov
• Mahkum
• Qamoqxona