Jizzaxda o‘z sherigini otib qo‘ygan ovchi jinoiy jazoga tortildi. Sud hujjati bilan tanishgan Kun.uz nashrining ma’lum qilishicha, Samarqand viloyatining Ishtixon tumanida yashovchi 31 yoshli G‘.A. 2025-yil 5-oktyabr kuni 3 nafar do‘sti bilan ov qilish maqsadida Jizzax viloyatining Mirzacho‘l tumaniga borgan. Ular tumanning Gulzor mahallasidagi dala maydonida yovvoyi to‘ng‘izni ovlamoqchi bo‘lgan. Ovchilar turli joyga, qamishlar orasiga berkinishgan.

G‘.A. berkinib o‘tirganda sherigi O.M. qamishlar orasidan unga yaqinlashgan. Do‘stini yovvoyi hayvon deb o‘ylagan G‘.A. ehtiyotsizlik oqibatida unga qarata ov qurolidan bir marta o‘q uzgan. Otilgan o‘q O.M.ning bosh miya orqa qismi chap tomonini jarohatlagan.

Rasman ro‘yxatdan o‘tib, 2 yildan buyon ovchilik bilan shug‘ullanib kelgan G‘.A. sudda aybiga iqrorlik bildirgan va sherigini bilmasdan otib qo‘yganini aytgan.

“Kunduz kuni baliq tutib, dam olib o‘tirganimizda yovvoyi to‘ng‘iz izini ko‘rdik. Kechda ushbu hayvonni ovlash maqsadida oldindan kelishilgan joylarni egallab, kuta boshladik. Biroq yovvoyi to‘ng‘iz biz tomonga emas, makkajo‘xori tomonga qarab qochdi. Keyin zovur oldidagi balandlikka chiqib, joylarimizni o‘zgartirdik. Men transformator oldidagi simyog‘och tagiga joylashdim. O.M. mendan 100 metr uzoqlikda bo‘lgan masofada o‘tirdi.

Bu vaqtda chuqurlikda hech kim yo‘q edi. Soat taxminan 22:30 lar atrofida mendan 15-20 metr uzoqlikdagi balandlik yonboshida qora sharpa ko‘rindi va shitirlab men tomonga kela boshladi. Engashib yurib kelayotgani uchun uni yovvoyi to‘ng‘iz, deb o‘ylab, ov qurolimni to‘g‘riladim. Sharpa o‘sha atrofdagi chuqurlikka qarab yura boshladi. Keyin unga qarata o‘q uzdim. Shu vaqtda o‘sha yerdan odamning baqirgan ovozi eshitildi.

Yugurib borsam O.M. boshini ikki qo‘li bilan ushlab, enkayib yotgan ekan. Unga tur, hazillashma, dedim. Bosh kiyimini yechganida qo‘li qonligini ko‘rib qo‘rqib ketdim”, – degan G‘.A. o‘z ko‘rsatmasida.

So‘ngra G‘.A. sheriklarini yordamga chaqirgan. Do‘stlar birgalashib yaralangan O.M.ni shifoxonaga olib borgan. Biroq u ko‘rsatilgan tibbiy yordamga qaramay, shifoxonada vafot etgan.

Sudlanuvchi O.M.ni qasddan otib o‘ldirmaganini, o‘sha vaqtda atrof qorong‘i bo‘lgani sababli hech narsa ko‘rinmaganini, marhum yaqin do‘sti bo‘lganini aytib, suddan yengillik so‘ragan.

JIB Mirzacho‘l tuman sudining hukmi bilan G‘.A. Jinoyat kodeksining 102-moddasi 1-qismida nazarda tutilgan jinoyatni sodir etishda aybli deb topildi va unga 1 yil muddatga ov qilish huquqidan mahrum qilib, ish haqining 20 foizini davlat daromadi hisobiga ushlab qolgan holda 1,5 yil axloq tuzatish ishlari jazosi tayinlandi.

• Jinoyat
• Jizzax
• Qurol