Yanvar-sentyabr oylarida O‘zbekiston oltin eksportini 9,9 mlrd dollargacha oshirdi. Sentyabr oyining o‘zida O‘zbekiston 1,5 mlrd dollarlik oltin eksport qildi.

O‘zbekiston Markaziy banki avgust oyida 2 tonna oltin xarid qilgan. Biroq, yil boshidan buyon mamlakat oltin-valyuta zaxiralarida oltinning fizik hajmi 17 tonnaga kamayib, 366 tonnani tashkil etdi. Shu nuqtayi nazardan, O‘zbekiston oltin sotishda dunyo bo‘yicha yetakchilik maqomini saqlab qolmoqda.

Avvalroq eksport hajmi fevral oyida 1,73 mlrd dollar, mart oyida 1,84 mlrd dollar, aprel oyida 1,91 mlrd dollar, may oyida 1,01 mlrd dollar, iyul oyida 1,09 mlrd dollar, avgust oyida 836 mln dollar darajasida qayd etilgandi. Mamlakat eksporti tarkibida oltinning ulushi 37,1 foizga yetdi (o‘tgan yilning shu davrida — 28,9 foiz).

Milliy statistika qo‘mitasi jismoniy hajmda qancha oltin eksport qilinganini ochiqlamagan.

O‘zbekiston prezidenti Shavkat Mirziyoyev avvalroq geologiya-qidiruv ishlarida yangi yondashuvlarni joriy etish hisobiga oltin va uran qazib olish hajmi sezilarli darajada oshganini ma’lum qilgandi. Uning so‘zlariga ko‘ra, 2016-yilda oltin qazib olish hajmi 86 tonnani tashkil etgan bo‘lsa, joriy yilda 118 tonnaga yetishi kutilmoqda.

• Eksport
• Oltin
• statistika