O‘zbekistonda endi haydovchilik huquqidan mahrum etilgan inson mashina boshqarsa, holat kameralar tomonidan aniqlanib, huquqbuzarga nisbatan chora ko‘riladi. Bu haqda YHXX axborot xizmati rahbari Zoir Yo‘ldoshev xabar berdi.

“Haydovchilik huquqisiz yoki ushbu huquqdan mahrum etilgan shaxslarning qonunbuzarliklari jamiyat uchun katta ko‘ngilsizliklar keltirib chiqarishining oldini olishda endi raqamli texnologiyalar imkoniyatlaridan keng foydalaniladi”, – dedi Zoir Yo‘ldoshev.

​Unga ko‘ra, hozirda O‘zbekistondagi avtomobil yo‘llarida shaxsning yuzini aniqlash funksiyasiga ega kameralar hamda foto va video qayd etish qurilmalari o‘rnatilgan bo‘lib, 2026-yilning 23-fevralidan 3-martgacha test rejimida ishlagan ushbu qurilmalar orqali bir qancha haydovchilik huquqidan mahrum etilgan fuqarolarning mashina boshqargani, boshqaruv vaqtida telefondan foydalangani aniqlangan. Endilikda ushbu qurilmalar qoidabuzarliklarga nisbatan onlayn ravishda chora ko‘rishni  boshlaydi. Boshqaruv huquqidan mahrum etilgan shaxslarning transport vositasini boshqarishi Ma’muriy javobgarlik to‘g‘risidagi kodeksning 135-moddasi uchinchi qismi bilan bazaviy hisoblash miqdorining 50 baravari — 20,6 million so‘m miqdorida jarima solishga sabab bo‘ladi. Agar haydovchilik huquqidan mahrum etilgan shaxs ma’muriy jazo qo‘llanilgandan keyin ham avtomashina boshqarsa, unga nisbatan Jinoyat kodeksining 261-2-moddasi (transport vositalarini boshqarish huquqidan mahrum etilgan shaxsning transport vositasini boshqarishi) bilan BHMning 50 baravaridan 100 baravarigacha — 20,6 million so‘mdan 41,2 million so‘mgacha miqdorda jarima yoki ikki yilgacha axloq tuzatish ishlari yoxud ikki yildan uch yilgacha ozodlikdan mahrum etish bilan jazolanadi.

• Haydovchi
• Jarima
• Qoidabuzarlik