O‘zbekistonda 25 dan ortiq faoliyat turi bo‘yicha monopoliyalar tugatiladi. Bu haqida Adliya vazirligining Huquqiy axborot kanali xabar berdi.

Qayd etilishicha, Yangi O‘zbekistonning taraqqiyot strategiyasi va uni “Inson qadrini ulug‘lash va faol mahalla yili”da amalga oshirishga oid davlat dasturi tasdiqlangan.

Dastur doirasida, 2022-yilda inflyasiyani 9 foizgacha va 2023-yilda 5 foiz va fiskal taqchillikni 3 foizgacha pasaytirish choralari ko‘riladi. Shuningdek, 2026-yil yakunigacha bank aktivlarida xususiy sektor ulushi 60 foizgacha chiqariladi.
Shu bilan birga, 2023-yildan qo‘shilgan qiymat solig‘i 12 foizgacha va bank, moliya va telekommunikatsiya kabi tadbirkorlik uchun foyda solig‘i 15 foizgacha tushiriladi.

Bundan tashqari, 2026-yilgacha energiya samaradorligi 20 foizga oshiriladi va havoga chiqariladigan zararli gazlar 10 foizga qisqartiriladi.
Sharoiti “og‘ir” bo‘lgan hududlarda 2025-yil 1-yanvargacha yangi tadbirkorlar uchun aylanmadan olinadigan soliq 1 foiz, yer solig‘i, mol-mulk solig‘i hisoblangan summadan 1 foiz stavkada to‘lash tizimi joriy etiladi.

Ma’lum qilinishicha, 2025-yil 1-iyuldan tadbirkorlikka oid barcha majburiy talablar yagona elektron reyestri ishga tushiriladi. 2022-yil 1-aprelgacha esa litsenziya va boshqa ruxsat etuvchi hujjatlarni olish soddalashtiriladi. Jumladan, muayyan faoliyat bilan ko‘chma tartibda, avtotransport orqali shug‘ullanish imkoniyati yaratiladi.

Ta’kidlanishicha, 25 dan ortiq faoliyat turi bo‘yicha monopoliyalar (suyultirilgan gaz yetkazish, neft mahsulotlarini saqlash va boshqalar) tugatilishi ko‘zda tutilgan.

• Monopoliya