O‘zbekistonda davlat organlarining xizmat avtotransport vositalari xatlovdan o‘tkazilib, ortiqchasi sotuvga qo‘yiladi. Bu haqda prezidentning 27-dekabrdan kuchga kirgan “Davlat xaridlari tizimida raqobat muhiti va shaffoflikni ta’minlash bo‘yicha navbatdagi chora-tadbirlar to‘g‘risida”gi farmonida belgilandi.

Hujjatga ko‘ra, Hisob palatasi va Davlat moliyaviy nazorat inspeksiyasi uch oy muddatda Ichki ishlar vazirligi bilan birgalikda davlat boshqaruvi va mahalliy davlat hokimiyati organlarining foydalanishida mavjud bo‘lgan xizmat avtotransport vositalarini xatlovdan o‘tkazadi.

Xatlov natijalariga ko‘ra belgilangan me’yorlar bo‘yicha limitdan ortiqcha bo‘lgan xizmat avtotransport vositalari o‘rnatilgan tartibda sotilishi ta’minlanadi va amalga oshirilgan ishlar haqida 2026-yil 1-iyunga qadar Prezident administratsiyasiga axborot kiritiladi. Hisob palatasi va Davlat moliyaviy nazorat inspeksiyasi davlat buyurtmachilari kesimida avtotransport vositalarini xarid qilish ustidan doimiy ravishda nazorat o‘rnatilishini ta’minlaydi.

• Avtotransport
• Hokimlik
• tekshiruv