Toshkentning Yashnobod tumanida ona 3 yoshli o‘g‘liga muntazam ravishda jismoniy zo‘ravonlik qilgani, shuningdek, uni qarovsiz qoldirish uchun uxlatuvchi dori vositasini bergani aniqlandi. Bu haqda Bolalar ombudsmani ma’lum qildi.

Ma’lum bo‘lishicha, bir guruh qo‘shnilar Bolalar ombudsmaniga murojaat qilib, 1989-yilda tug‘ilgan A.T. voyaga yetmagan o‘g‘li A.I.ga nisbatan muntazam zo‘ravonlik qilayotgani haqida xabar bergan. Murojaatda ona bolaga uxlatuvchi dori berib, uni doimiy ravishda qarovsiz va parvarishsiz qoldirayotgani ham qayd etilgan.

Holat Bolalar ombudsmanining rasmiy so‘rovi asosida Ichki ishlar boshqarmasi hamda Ijtimoiy himoya milliy agentligi tomonidan o‘rganilgan.

Tekshiruv natijasida bolaga nisbatan muttasil tazyiq va qiynash holatlari bo‘yicha Jinoyat kodeksining 110-moddasi bilan jinoyat ishi qo‘zg‘atilgan. Shuningdek, bolaning xavfsizligini ta’minlash maqsadida unga himoya orderi rasmiylashtirilgan.

Hozirda bolaning sog‘lig‘ini tiklash uchun zarur tibbiy muolajalar ko‘rsatilgan. Bolalar ombudsmani xabariga ko‘ra, uning salomatligi hozir barqaror va yaxshi holatda.

Bolaning qonuniy manfaatlarini himoya qilish maqsadida tuman vasiylik organi tomonidan unga vaqtincha vasiylik ta’minlangan.

Shuningdek, bolaning onasi ota-onalik majburiyatlarini bajarmagani sababli uni onalik huquqidan mahrum qilish bo‘yicha sudga murojaat etish uchun tegishli hujjatlar tayyorlanmoqda.

Bolalar ombudsmani avval ham bolalarga nisbatan zo‘ravonlik holatlari yuzasidan huquqni muhofaza qiluvchi organlarga murojaat qilgan. Jumladan, 27-iyul kuni Surxondaryoning Qumqo‘rg‘on tumanida otaning 9 yoshli qiziga nisbatan shafqatsiz munosabatda bo‘lgani haqidagi holat bo‘yicha ham jinoyat ishi qo‘zg‘atilgan.