Toshkent shahri Uchtepa tumanida yuz bergan yong‘inni o‘chirish vaqtida Favqulodda vaziyatlar vazirligi Maxsus qutqaruv batalyoni guruh komandiri, kapitan Boburmirzo Pardayev fojiali tarzda halok bo‘ldi.

Boburmirzo Pardayev safdoshlari bilan birga yonayotgan uydan odamlarni olib chiqish jarayonida yetti kishining hayotini saqlab qoldi. Biroq qutqaruv ishlari vaqtida tom qismining to‘satdan qulab tushishi oqibatida u og‘ir jarohatlanib, hayotdan ko‘z yumdi.

Qahramon qutqaruvchining jasorati va fidoyiligi tufayli yetti inson hayoti saqlab qolindi. Uning so‘nggi lahzagacha o‘z vazifasiga sodiq qolib, odamlar hayotini o‘z xavfsizligidan ustun qo‘ygani yuksak jasorat namunasidir.

Boburmirzo Pardayevning oila a’zolari va yaqinlariga, do‘stlari hamda barcha safdoshlariga chuqur hamdardlik bildiramiz.

Qahramonimizning oxirati obod bo‘lsin. Joylari jannatdan bo‘lsin.