Davlat xavfsizlik xizmati, Iqtisodiy jinoyatlarga qarshi kurashish departamenti hamda Ichki ishlar organlari xodimlari hamkorligida o‘tkazilgan tezkor tadbirlar davomida fuqarolarni xorijiy davlatlarga ishga yuborish va viza rasmiylashtirish va’dasi bilan pul mablag‘larini o‘zlashtirish bilan bog‘liq bir qator firibgarlik holatlari fosh etildi.

Toshkent shahrida yashovchi, 1985-yilda tug‘ilgan, muqaddam sudlangan shaxs tanishlari orqali Qashqadaryo viloyatida istiqomat qiluvchi 6 nafar fuqaroni Slovakiya Respublikasiga ishga yuborishni va’da qilgan. Buning evaziga 145 mln so‘m talab qilib, oldindan 85 mln so‘m olgan vaqtida ashyoviy dalillar bilan ushlandi.

Boshqa holatda, Toshkent shahrida xorijiy davlatlarga viza olish bo‘yicha konsalting xizmatlarini ko‘rsatuvchi MCHJ rahbari 2002-yilda tug‘ilgan fuqaroning ishonchiga kirib, viza rasmiylashtirish va uni Germaniyaga ishga yuborish evaziga 4 ming AQSH dollari olgan vaqtida ushlandi.

Shuningdek, Toshkent viloyatining Zangiota tumanida yashovchi, 1993-yilda tug‘ilgan ayol 2000-yilda tug‘ilgan, Angren shahrida istiqomat qiluvchi fuqaroning ishonchiga kirib, viza rasmiylashtirish va uni Janubiy Koreyaga ishga yuborishni va’da qilgan. U ushbu xizmat evaziga 5 900 AQSH dollari olgan vaqtida ushlandi.

Mazkur holatlar yuzasidan qonunbuzarlarga nisbatan O‘zbekiston Respublikasi Jinoyat kodeksining 168-moddasi (firibgarlik) bilan jinoyat ishlari qo‘zg‘atilgan. Hozirda tergov harakatlari olib borilmoqda.

Fuqarolardan xorijga ishga yuborish yoki viza rasmiylashtirishni va’da qilayotgan shaxslarga pul mablag‘larini topshirishdan avval ularning faoliyati, hujjatlari hamda taklif qilayotgan xizmatlarining qonuniyligini sinchiklab tekshirish so‘raladi.