Moskvada Investitsiyalar va tashqi savdo vazirligi hamda Rossiyaning “Gerofarm” biotexnologiya kompaniyasi rahbariyati insulin dori vositalarini ishlab chiqarish va yetkazib berish loyihasini shakllantirish bo‘yicha amaliy chora-tadbirlarni boshlash to‘g‘risida bitim imzoladilar.

Hujjatda Investitsiyalar va tashqi savdo va Sog‘liqni saqlash vazirliklari va “Gerofarm” kompaniyasi o‘rtasida O‘zbekistonda insulin ishlab chiqarishni mahalliylashtirish loyihasini hayotga joriy etish bo‘yicha ishchi guruh tuzish nazarda tutilgan.

Loyihaning amalga oshirilishi qandli diabet bilan og‘riydigan bemorlar uchun bir qator muhim dori vositalarining ommabopligini sezilarli darajada oshiradi hamda O‘zbekiston sog‘liqni saqlash tizimining ushbu dorilar importiga qaramligini kamaytirish, dori-darmon xavfsizligini ta’minlash va mamlakatda biotexnologik ishlab chiqarishni rivojlantirishda muhim qadam bo‘ladi.

Hujjatga muvofiq, O‘zbekiston Investisiyalar va tashqi savdo vazirligi Rossiya ishlab chiqaruvchisiga loyihani amalga oshirish bilan bog‘liq masalalarni hal qilishda har tomonlama ko‘mak beradi. Yaqin kelajakda tomonlar loyihani hayotga tatbiq etish bo‘yicha aniq chora-tadbirlar va muddatlarni o‘z ichiga olgan “Yo‘l xaritasi”ni ishlab chiqib tasdiqlaydilar.

Ma’lumot uchun, “Gerofarm” MChJ MDH va YeOII mamlakatlarida biotexnologik dori ishlab chiqaruvchilari orasida yetakchi kompaniya hisoblanadi. Kompaniya endokrinologiya sohasida yuqori texnologiyali mahsulotlarni eksport qiladi.

• Dori
• Insulin
• Rossiya