Prezident farmoni bilan Oila va xotin-qizlar qo‘mitasi yana Vazirlar Mahkamasi bo‘ysunuviga o‘tkazildi.

2023-yil 1-yanvarda Xotin-qizlar va oila ishlari qo‘mitasi Kambag‘allikni qisqartirish va bandlik vazirligiga o‘tkazilib, bosh vazirning xotin-qizlar va oila masalalari bo‘yicha o‘rinbosari lavozimi tugatilgandi.

Shu yil 21-dekabr prezidentning (PF-208-sonli) “Oila va xotin-qizlar qo‘mitasining faoliyatini takomillashtirishga oid qo‘shimcha chora-tadbirlar to‘g‘risida”gi farmoni qabul qilindi. Bu haqda Adliya vazirligi xabar qildi.

Farmonga ko‘ra, Oila va xotin-qizlar qo‘mitasining bo‘ysunuvi Kambag‘allikni qisqartirish va bandlik vazirligidan Vazirlar Mahkamasiga o‘tkazildi.

Qo‘mita faoliyatini samarali tashkil etish maqsadida Vazirlar Mahkamasida bosh vazir o‘rinbosari – Oila va xotin-qizlar qo‘mitasi raisi lavozimi joriy etildi.

Shuningdek, Qo‘mita raisi bilan kelishilgan holda lavozimga tayinlanadigan va lavozimidan ozod etiladigan:

· Qoraqalpog‘iston Respublikasi Vazirlar Kengashi raisi o‘rinbosari – Qoraqalpog‘iston Respublikasi Oila va xotin-qizlar qo‘mitasi raisi lavozimi;

· viloyatlar va Toshkent shahar hokimlari o‘rinbosarlari – viloyatlar va Toshkent shahar oila va xotin-qizlar boshqarmalari boshliqlari lavozimi;

· tuman (shahar) hokimlarining o‘rinbosarlari – tuman (shahar) oila va xotin-qizlar bo‘limlari boshliqlari lavozimi kiritildi.

Oila va xotin-qizlar ilmiy-tadqiqot instituti negizida Oila va gender ilmiy-tadqiqot instituti tashkil etildi.

• Bosh vazir
• Xotin-qizlar