Qadimiy Xiva shahrida o‘tkazilgan VI xalqaro Strongmen-bahodirlar o‘yinlari o‘z nihoyasiga yetdi. Musobaqaning final bosqichida turli davlatlardan kelgan ishtirokchilar kuch, chidamlilik va mahorat borasida keskin bahs olib bordi.

Yakuniy natijalarga ko‘ra, o‘zbekistonlik sportchi Muhammadali To‘xtamatov barcha sinovlarni muvaffaqiyatli yakunlab, faxrli 1-o‘rinni qo‘lga kiritdi. Yangi Zelandiya vakili Tiano Dean Russel Faapoi ikkinchi, Litva sportchisi Jokuzus Vilius esa uchinchi pog‘onadan joy oldi.

G‘olib va sovrindorlarga pul mukofotlari hamda esdalik sovg‘alari topshirildi. Shuningdek, xalqaro turnirda qatnashgan barcha bahodirlar ham tashkilotchilar tomonidan qimmatbaho sovg‘alar bilan taqdirlandi.

Musobaqa davomida Xiva nafaqat kuchli sportchilar bellashuviga, balki turli mamlakatlardan tashrif buyurgan ishtirokchilar va mehmonlarni birlashtirgan nufuzli xalqaro maydonga aylandi. Tashkilotchilar ta’kidlashicha, bu kabi turnirlar milliy sport an’analarini ommalashtirish, xalqaro hamkorlikni mustahkamlash va mamlakatning sayyohlik salohiyatini namoyish etishda muhim ahamiyat kasb etadi.