Moskvada Tojikiston va O‘zbekiston fuqarolariga soxta hujjatlar asosida Rossiya fuqaroligini olishga yordam bergan jinoiy guruh qo‘lga olindi. Bu haqda Rossiya Tergov qo‘mitasi xabar berdi.

Qayd etilishicha, gumonlanuvchilar 2023-yilda davlat organlari faoliyatini tushunadigan va Rossiya Federatsiyasi fuqaroligini berish bo‘yicha qaror qabul qilish vakolatiga ega bo‘lgan mansabdor shaxslar bilan aloqalarga ega bo‘lib, ko‘plab jinoyatlar sodir etish va shaxsiy boylik orttirish maqsadida jinoiy guruh tuzgan.

“Hamkorlar” Tojikiston va O‘zbekiston fuqarolari orasidan Rossiya fuqaroligini qonuniy asoslar bo‘lmasdan olishni istagan shaxslarni topgan. Keyin, ular 150-350 ming rubl evaziga Ukraina fuqaroligini tasdiqlovchi soxta plastik pasportlar va Donetsk hududida ro‘yxatdan o‘tganlik to‘g‘risidagi soxta ma’lumotnomalarni tayyorlab bergan. Bu xorijiy fuqarolarga soddalashtirilgan tartibda Rossiya fuqaroligini olish imkonini bergan.

Keltirilishicha, jinoyat ishi doirasida Moskva, Donetsk, Rostov-Don va Tulada 30 ta tintuv o‘tkazilib, davlat organlari va muassasalariga tegishli bo‘lgan ko‘plab shtamplar, muhrlar va blankalar, shu jumladan, chet davlatning blankalari musodara qilingan.

Shuningdek, jinoiy guruhning 9 nafar tashkilotchisi qo‘lga olingan. Ular bilan zarur tergov harakatlari olib borilib, ularga ayblov e’lon qilingan.

• Fuqarolik
• Rossiya
• Ukraina