$
10845.02 UZS
9.95
141.68 UZS
0.14
12297.17 UZS
1.53
18° Kechasi

O‘zini Prezident Administratsiyasi xodimi deb tanishtirgan mahkumning jazo chorasi og‘irrog‘iga almashtirildi

18:07 / 07.12.2021

Toshkent viloyatida mahkum o‘zini Prezident Administratsiyasi xodimi deb tanishtirib, unga avvaldan tanish bo‘lgan fuqaroni ishga joylashga uringan.

IIV Matbuot xizmatining ma’lum qilishicha, Toshkent viloyati Chirchiq shahrida bir necha marta qonunbuzarliklar sodir etgani uchun sudlangan T.T. ismli shaxs navbatdagi jazo muddatini o‘tayotgan vaqtida Qashqadaryo viloyati elektr tarmoqlari korxonasi boshlig‘iga uyali telefoni orqali qo‘ng‘iroq qilib, o‘zini Prezident Administratsiyasining mas’ul xodimi deb tanishtiradi va unga o‘zining nomidan ish so‘rab bir kishi borishini, uni ish bilan ta’minlashini aytadi. 

Xabarda aytilishicha, mazkur holat yuzasidan IIV huzuridagi Jazoni ijro etish departamenti va boshqa huquqni muhofaza qiluvchi organlar bilan tezkor tadbir o‘tkazilgan.

Tezkor tadbir davomida mahkum T.T. daliliy ashyolar bilan qo‘lga olingan.

Jazoni ijro etish departamenti tomonidan Jinoyat ijroiya kodeksining 120-moddasiga muvofiq T.T. ashaddiy tartibbuzar deb topilgan va unga nisbatan jazosini o‘talmay qolgan 3 yil-u 5 oy 24 kun muddatni manzil kaloniyasidan umumiy tartibdagi kaloniyaga ko‘chirish jazosi qo‘llanildi.

Mazkur holat yuzasidan prokuratura organlari tomonidan tergovga qadar tekshiruv harakatlari olib borilmoqda.

Ma’lumot uchun, mahkum T.T. so‘nggi marta 2020-yilning 24-avgust kuni Chirchiq shahar sudi tomonidan Jinoyat kodeksining 228-moddasi bilan 4 yil-u 6 oy muddatga ozodlikdan mahrum qilingan.


O‘zbekiston