Oziq-ovqatni yomon bo‘lib qolmasligiga jiddiy e’tibor qaratamiz, lekin ampula, sirop kabi suyuq va boshqa turli xil giyohlarning saqlanishi ham jiddiy e’tibor talab qiladi.

Ahamiyat bergan bo‘lsangiz, har bir preparat yo‘riqnomasida uni saqlash qoidasi ko‘rsatilgan bo‘ladi.

Tabletka va kapsula ko‘rinishidagi preparatlar uchun namlik darajasi juda muhim. Ularni salqin va quruq joyga qo‘ying. Aerozol yoki sprey shaklidagi dorilar uchun yorug‘lik nuri va xona harorati yuqori bo‘lmasligiga e’tibor qarating.

Tindirma yoki tomchi dorilar qo‘ng‘ir (himoyalangan) tusli idishlarda ishlab chiqilsa-da, ular ham quyoshni “xushlashmaydi”.

Sovitkichga qo‘yamizmi?
Agar preparat yo‘riqnomasida “salqin va yorug‘lik nuridan himoyalangan joyda saqlang” deyilgan bo‘lsa, unda sovitkichga joylash mumkin.

“5 gradusdan oshmagan holda saqlansin” deya ko‘rsatma berilgan bo‘lsa, dorilarni sovitkichga qo‘ysa bo‘ladi.

Surtma va moyli dorilar, shamchalar hamda suyuq ko‘rinishdagi preparatlar uchun sovitkich eshigidagi qavatlar munosib tanlov.

• salomatlik