Ko‘z kasalliklari bo‘yicha jarroh Jamshiddin Sagdiyev ko‘zni qanday suyuqliklarda yuvib turish foyda berishi haqida tavsiyalar berdi. Bu haqda “Daryo.uz” xabar berdi.

Shifokorning aytishicha, furatsilin eritmasi, moychechak yoki ko‘k choy damlamasi ko‘zni chayish uning dam olishiga yordam beradi. Ba’zi bemorlarga ko‘zga dori tomizishdan oldin ko‘zni damlamalarda yuvish tavsiya qilinadi. Bunda ko‘z “yengillashadi”, undagi ortiqcha moddalar chiqib ketadi va tomchi dorilar yaxshi natija beradi.

Ko‘z chayishni kuniga 6-7 mahalgacha qilish mumkin. Buning hech qanday ko‘zga zarari yo‘q.

Qanday bajariladi?
Masalan, ko‘k choy damlamasi tayyorlanib, shpris yoki paxtaga shimitgan holda ko‘zga quyiladi. Bu amaliyotdan 5-10 daqiqa o‘tib, odatiy ish tartibida davom etish mumkin.

Foydasi
Birinchi o‘rinda ko‘z ichidagi bakteriyalar, infeksiyalar, tashqi changlar kabi ortiqcha moddalarni chiqarib yuboradi. Shuningdek, ko‘z qurishi sindromini oldini oladi. Ko‘z shamollashini bartaraf etishda ham juda foydali.

Qanday holatlarda mumkin emas?
Bemorning ko‘zida linza bo‘lsa, yuvish mumkin emas. Boisi chayish vaqtida linza chiqib ketishi mumkin. Jarrohlik amaliyotidan keyin, jarohatlar yangi bo‘lgan davrda ko‘zni chayish tavsiya etilmaydi.

• salomatlik