Prezident Vladimir Putin harbiy xizmatga chaqirish to‘g‘risidagi farmonni imzoladi, hujjat mamlakatning huquqiy axborot rasmiy portalida e’lon qilindi.

Qarorda aytilishicha, chaqiruv 1-apreldan 15-iyulgacha bo‘lib o‘tadi, qurolli kuchlar safiga 147 ming kishini jalb etish rejalashtirilgan. Muddatli harbiy xizmatchilarning yoshi 18 yoshdan 27 yoshgacha bo‘ladi.

Xuddi shu farmon bilan prezident “harbiy xizmat muddati tugagan” askarlar, matroslar, serjantlar va brigadirlarni ishdan bo‘shatish to‘g‘risida qaror qabul qildi.

2022-yilning bahorida 134 ming nafar, 2022-yilning kuzida esa 120 ming kishini harbiy xizmatga olish rejalashtirilgan edi.

Davlat Dumasi Mudofaa qo‘mitasi rahbari Andrey Kartapolov bahorgi kampaniyada xizmatga chaqirilganlar Rossiyaning yangi subyektlari – DXR, LXR, Zaporojiye va Xerson viloyatlariga yuborilmasligiga ishontirgan. Uning qayd etishicha, ushbu hududlarda muddatli harbiy xizmatga chaqiruv bahor faslida o‘tkazilmaydi.

Mart oyida Davlat Dumasiga chaqiruv yoshini hozirgi 18-27 yosh o‘rniga 21-30 yoshga ko‘tarish to‘g‘risidagi qonun loyihasi kiritildi. Uning mualliflari, jumladan, Kartapolov va uning birinchi o‘rinbosari Andrey Krasov chaqiruv yoshini 2026-yildan boshlab oshirishni taklif qilgan. Shu bilan birga, qonun loyihasi 18 yoshdan boshlab xizmatga ixtiyoriy ravishda borishga ham ruxsat beradi.

2022-yilning dekabr oyida mudofaa vaziri Sergey Shoygu chaqiruv yoshini 30 yoshgacha oshirish, shu bilan birga, u qurolli kuchlar sonini 1,5 million harbiy xizmatchiga ko‘paytirishni ham taklif qildi, ular orasida 695 mingga yaqin shartnoma bo‘yicha harbiy xizmatchilar bo‘lishi kerak. O‘shanda Putin tashabbusni qo‘llab-quvvatlagan.