“Rossiya prezidenti Vladimir Putin shu haftada AQSh prezidenti Donald Tramp bilan telefon orqali suhbatda Kiyevdan Donetsk viloyati ustidan nazoratni Moskvaga to‘liq topshirishni urushni to‘xtatish sharti sifatida talab qilgan”, – deya xabar berdi The Washington Post.

“Mazkur muloqot davomida Putin Rossiya Zaporoje va Xerson viloyatlarining hali bosib olinmagan qismlariga da’vosidan voz kechishga tayyorligini ham bildirgan. Bu Putin tomonidan Alyaskadagi sammitda aytilgan bayonotlarga nisbatan ma’lum bir siljish sifatida baholangan. Oq uyning ayrim vakillari bu so‘zlarni ijobiy signal sifatida qabul qilgan”, – deya yozmoqda nashr.

Rasmiylarning so‘zlariga ko‘ra, Donald Trampning maxsus vakili Stiv Uitkoff juma kuni Oq uyda o‘tkazilgan uchrashuvda Ukraina delegatsiyasiga Donetsk viloyatini Rossiyaga berish masalasida bosim o‘tkazgan, u bu hudud asosan rus tilida so‘zlashuvchi aholi yashashini eslatib o‘tgan.

Shu bilan birga, Donald Trampning o‘zi Putinning talablarini ochiqchasiga izohlamagan. Zelenskiy bilan uchrashuv yakunida u shunchaki “Tomonlar hozir turgan joylarida to‘xtashlari kerak”, — deb aytgan.

• Putin
• Rossiya
• Tramp
• Ukraina