Shaxsiy intizom masalasi koʻpchilik uchun katta ahamiyatga ega. Bu aksariyat holatlarda oʻqish yoki ishdagi samaradorlikni belgilab beradi, oʻzingizga boʻlgan ishonchingizni oshiradi.
Eng avvalo shaxsiy intizom tushunchasining nima ekanligini aniqlab olaylik – bu odamning oʻz xatti-harakatlari, yurish-turishi, hayotining har bir kunini nazorat ostida tutish qobiliyatidir. Shuni alohida taʼkidlash kerakki, intizom tugʻma boʻlmaydi, u yillar davomida doimiy mashq qilish natijasida shakllanadi. Kun tartibiga amal qilish ham intizomning oʻziga xos koʻrinishlaridan biri. Kichik yoshli bolalarga ovqatlanish, dars qilish, sayrga chiqish, shaxsiy gigiyena uchun vaqt ajratib berish ham ularni intizomga oʻrgatadi.
Agar oʻzingizni yetarli yetarlicha intizomli odam deb bilmasangiz, bu holat oʻqish va ish jarayonida sizga koʻplab noqulayliklarni keltirib chiqarayotgan boʻlsa, oʻzingizda intizomni shakllantirishni bugundanoq boshlang. Quyidagi 5 tavsiya sizga bu borada katta yordam beradi.
1. Ishlaringizni rejalashtiring.
Buning uchun maxsus kundalik tutishni maslahat beramiz. Unga amalga oshirishingiz kerak boʻlgan ishlar, maqsadlaringiz, rejalaringiz, daromad koʻrsatkichlari, kun tartibi, muhim sanalarni qayd etib borasiz. Yakunlagan ishingizni yondaftardan oʻchirib qoʻyasiz, bu intizomingizdan qoniqish hissini keltirib chiqaradi, natijada keyingi ishlarni ham bajarishga moyillik va istak paydo boʻladi.
2. Odatlarni shakllantiring.
Oʻzingiz uchun har kuni va bir vaqtda takrorlanadigan yumushlar oʻylab toping. Bu maʼlum bir vaqtda tish yuvish, dush qabul qilish, nonushta tanovuli, ishlarni rejalashtirish va ular kundalikka qayd etib qoʻyish kabi yumushlar boʻlishi mumkin. Qanchalar charchagan boʻlishingizga qaramay, uhlashdan avval tishlarni tozalamasdan turib yostiqqa bosh qoʻymang. Har dam olish kuni uyingizni tozalab chiqing, kirlarni yuving, gullarga suv quying. Bir qarashda oʻta oddiy koʻringan bu kabi yumushlarni har kuni bajarish natijasida sizda shaxsiy intizom paydo boʻladi.
3. Murakkab yumushlarni kichik qismlarga boʻlib bajaring.
Oʻz oldingizga qoʻygan maqsadingizni kichik qadamlarga boʻlib chiqish unga erishish jarayonini osonlashtiradi. Bu borada perfeksionizmni bir chetga surib qoʻyish kerak boʻladi. Bir joyda qotib turgandan koʻra, kichik qadamlar bilan boʻlsa ham maqsad tomon harakatlanish yaxshiroq ekanligini unutmang. Har kuni uxlash oldidan maqsadingizga erishish uchun bugun qanday ish qilganingizni oʻylang va keyingi kun uchun reja tuzib qoʻying.
4. Oʻzingiz sevgan biror narsadan voz keching.
Shaxsiy intizomni shakllantirish baʼzi odatlardan voz kechishni ham talab qilishi mumkin. Oʻzingiz sevgan biror narsadan — shirinliklar, ijtimoiy tarmoqlar, seriallar, dugonalar bilan uzoq suhbat qurish voz keching. Intizomni chiniqtirish uchun qarshingizdagi stolga bir boʻlak shirinlik qoʻying va 10 daqiqa davomida unga teginmasdan qarab turing. Shundan keyin shirinlikni muzlatgichga solib qoʻying va u haqida butkul unuting. Bu kabi mashqlar irodangizni ham mustahkamlaydi.
5. Intizomni shakllantirishdagi asosiy shart – davomiylikdir.
Sport bilan shugʻullanishni boshlang va har kuni 10 daqiqa vaqtingizni mashgʻulotlar uchun ajrating. Erta uxlab, ertaroq turishga harakat qiling va tongni iliq suv ichishdan boshlang. Ingliz tilini oʻrganmoqchi boʻlsangiz, har kuni kamida 10 daqiqa dars qiling. Bu kabi ishlardagi asosiy jihat — davomiylikdir. Har kuni takrorlanadigan ishlar oxir-oqibatda odatga aylanib qoladi va intizomni shakllantiradi, shuningdek irodangizni ham mustahkamlaydi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!