Qirg‘izistondagi sel oqimi umumiy foydalanishdagi yo‘llarga katta zarar yetkazdi. Hozirda zararning umumiy miqdori 261 million qirg‘iz somini tashkil qilmoqda. Bu haqda “24.kg” nashri ma’lum qildi.

Unga koʻra, vayron boʻlgan koʻpriklarning bir qismi allaqachon taʼmirlangan, qolgan obyektlarda faol ish olib borilmoqda. Hali infratuzilmani tiklash imkoni bo‘lmagan joylarda transport aloqalarini ta’minlash uchun aylanma yo‘llar qurilgan.

Eng ko‘p jabrlanganlar Botken, O‘sh va Jalolobod viloyatlari bo‘ldi. Botken viloyatida sel oqimi bitta, O‘sh viloyatida to‘rtta, Jalolobod viloyatida esa ikkita ko‘prikni vayron qilgan.

Eslatib o‘tamiz, 23-iyul kuni Jalolobod viloyatining Arstanbop qishlog‘ida sel oqimi kuzatilgan edi. Ushbu sel qishloqning ichki yo‘llarini yuvib, yengil inshootlarni buzib tashlagan edi.

• Qirg‘iziston