“Dunyo” axborot agentligi xabar berishicha, Polshada qiyin vaziyatga tushib qolgan ikki fuqaro elchixona ko‘magida O‘zbekistonga qaytarildi. Ulardan biri – namanganlik erkak salomatligidagi muammo sababli og‘ir ahvolga tushgani, ikkinchisi – qashqadaryolik erkak moliyaviy qiyinchilik va hujjatlarini yo‘qotgani bois elchixonaga murojaat qilgan. Shundan so‘ng elchixona vakillari ularni vatanga qaytarish uchun zarur chora-tadbirlarni amalga oshirgan.

Betob bo‘lib qolgan fuqaro insult tashxisi bilan tibbiy muassasada bo‘lgan. Shu bois, unga Polsha tibbiyot muassasasi tavsiyasiga muvofiq, parvozga ruxsat berilgunga qadar zarur tibbiy yordam ko‘rsatilgan. Ikkinchi fuqaroga esa O‘zbekistonga qaytish hujjatlari to‘g‘rilangan.

Ularni qaytarish Varshava­–Riga yo‘nalishida maxsus transportda, Riga­–Toshkent bo‘yicha esa aviareys orqali amalga oshirildi. Har ikki fuqaro uchun Latviyaga kirish ruxsatnomalari rasmiylashtirilib, tranzit harakati ta’minlangan. Rigagacha transport xizmatlari tashkil etilgan va aviachiptalar xarid qilingan.

• Elchixona
• O‘zbekiston
• Polsha
• fuqaro