Qozog‘iston Sog‘liqni saqlash vazirligi xabar berishicha, yangi xavfli infeksiya Marburg virusi tarqalishi tufayli epidemiologik vaziyat ustidan nazorat kuchaytirilgan.

Qozog‘iston davlat sanitariya bosh vrachi Sarxat Beysenovaning ta’kidlashicha, kasallikning respublikaga kirib kelishi va tarqalishining oldini olish maqsadida xalqaro aeroportlarda, davlat chegarasida sanitariya-karantin nazorati amalga oshirilmoqda, barcha kelgan yo‘lovchilarni kontaktsiz harorat o‘lchash yo‘li bilan tekshirish ishlari olib borilmoqda.

Qozog‘iston Sog‘liqni saqlash vazirligiga ko‘ra, kasallikning klinik belgilari virus yuqqandan keyin 2-21 kun ichida namoyon bo‘ladi. Shuningdek, vazirlik qozog‘istonliklarga epidemiya tarqalgan davlatlarga sayohat qilganda quyidagi profilaktik choralarni ko‘rishni tavsiya qildi:

- Virus yuqtirgan odamlar bilan aloqadan qochish;
- Afrika o‘rmonlarida yashovchi yovvoyi hayvonlardan ehtiyot bo‘lish;
- Mahalliy hayvonlarning go‘shtini yaxshi pishmagan holda iste’mol qilmaslik;
- Virus tashuvchi hisoblanuvchi Misr ko‘rshapalaklari yashaydigan g‘or va konlarga bormaslik;
- Kasallik alomatlari paydo bo‘lganda darhol tibbiy yordamga murojaat qilish;
- Shaxsiy gigiyena qoidalariga rioya qilish.

Shuningdek, Sog‘liqni saqlash vazirligi Marburg virusiga qarshi maxsus davolash usuli va vaksina yo‘qligini hamda faqat simptomatik davolash olib borilishini ma’lum qilgan.

Ma’lumot uchun, kasallikning asosiy simptomlari isitma, tomoq og‘rig‘i, toshma, qorin og‘rig‘i, burun va ko‘zdan qon ketishi.

• Qozog‘iston
• Virus