Ukrainada urush yigirma sakkiz kundan beri davom etmoqda. Bizning nazarimizda bu vaqt ko‘z ochib yumguncha o‘tib ketdi. Biroq Ukraina aholisi uchun o‘tayotgan har bir soniya oltinga teng bo‘lib, odamlar tahlikada kun kechirmoqda. Uch haftadan buyon Mariupol shahri qamalda.

Ushbu maqolada Rossiya Ukraina oʻrtasida kechayotgan urushning yigirma sakkizinchi kuni asosiy voqealari va fotosuratlarini toʻpladik

Kecha, erta tongda Ukrainaning bir nechta shaharlari yana oʻqqa tutildi. Zarbalar asosan turar-joy binolariga berilgan. Kiyev shahriga berilgan raketa zarbasi oqibatida toʻrt kishi jarohatlangan. 

Rossiya harbiylari Mariupolni qamal qilishda davom etmoqda. Kecha berilgan raketa zarbasi oqibatida Mariupoldagi Ivan Aivazovskiyning rasmlari saqlanadigan “Arxipa Kuindji” nomidagi sanʼat muzeyi binosi vayron qilingan.
 
Ukraina Sogʻliqni saqlash vaziri Viktor Liashkoning soʻzlariga koʻra, bir hafta ichida rossiyalik harbiylar 58 ta tez yordam mashinasini oʻqqa tutgan. Buning oqibatida jami 6 nafar tibbiyot xodimi halok boʻlgan.

Rossiya harbiylari dushman qoʻshinlariga qarshi dengizdan uzoq masofali yuqori aniqlikdagi qurollardan foydalanmoqda. Xususan, 22-mart kuni Rossiya armiyasi Ukrainaning Rovno shahri shimoli-gʻarbida joylashgan yirik qurol-yarogʻ va harbiy texnika omborini yuqori aniqlikdagi uzoq masofadan boshqariladigan raketa  bilan yoʻq qilgan. Buning oqibatida 70 ta ukrainalik harbiy halok boʻlgan. 

Rossiya Mudofaa vazirligi hozirda Novomikaylovka aholi punktini egallash uchun kurash olib borayotganini maʼlum qilgan.

Ukraina Qurolli Kuchlari Bosh shtabi maʼlumotlariga koʻra, Ukraina armiyasi Chernigov mudofaasini ushlab turishda va dushmanning Kiyev yoʻnalishida oldinga siljishini bartaraf etishda davom etmoqda. Hozirda Ukraina armiyasi rus qoʻshinlarining Zaporojya, Popasnaya va Kuraxovo yoʻnalishidagi harakatlarini toʻxtatib turibdi.

Baʼzi mutaxassislarning soʻzlariga koʻra, soʻngi toʻqnashuvlarda rus piyoda qoʻshinlari jiddiy talafotga uchrab, anchayin holdan toygan. Shu sababli Rossiya dushmanga asosan masofaviy raketa tizimi orqali hujum uyushtirmoqda. Boshqa ekspertlarning fikricha, Rossiya Ukraina oʻrtasidagi urush turgʻun holatga kelib qolgan.

Voqealar rivojini Xabardor.uz’da kuzatishda davom eting.

• Kiyev
• Rossiya
• Ukraina
• Urush