Ma’lumotlarga ko‘ra, Rossiyaga mehnat muhojirlarining kirib kelishi nafaqat jinoyatchilikning kuchayishiga, hattoki, pullarning xorijga chiqib ketishiga ham sabab bo‘lmoqda. Siyosatshunos Aleksey Yaroshenko Tojikiston, O‘zbekiston, Qirg‘iziston va Turkmanistonga pul o‘tkazmalari uchun majburiy komissiya joriy etish, shuningdek, ushbu respublikalardan tashrif buyuruvchilarning bank kartalariga xizmat ko‘rsatish to‘lovini oshirishni ham taklif qildi. Bu haqda "Ria Novosti" nashri xabar bermoqda.

Yaroshenkoning fikricha, bugun Rossiyada muhojirlar bilan jiddiy muammolar mavjud.

"Yangi kelganlar tez-tez jinoyat haqidagi xabarlarning "qahramonlariga" aylanishmoqda. 2022-yilda migrantlar tomonidan sodir etilgan og‘ir jinoyatlar, jumladan qotilliklar soni 21 foizga oshdi. Qamoqxonalarda 30 mingdan ortiq xorijlik bor. Mahbuslarning deyarli 7 foizi bu yerga kelib, ishlash o‘rniga jinoyat sodir etib, qamoqqa tushgan muhojirlardir. Ularni qamoqxonada saqlash har yili Rossiya byudjetiga 500 ming rublga tushmoqda. Umumiy xarajatlar yiliga 15 milliard rublni tashkil qiladi", – deydi siyosatshunos.

Aleksey Yaroshenkoning aytishicha, muhojirlar oqimi Rossiyada turmush darajasini pasaytirar ekan. 2023-yil boshida 563,6 mingdan ortiq Rossiya fuqarosi ishsizlar ro‘yxatiga kiritilgan. Ish beruvchilar Rossiya prezidentining ruslarning hayot farovonligini oshirish to‘g‘risidagi buyrug‘ini buzgan va chet elliklarni ishga olishni birinchi o‘ringa qo‘ygan. Natijada, rossiyaliklarning daromadlari oshmayapti, chunki ular ishga qabul qilinmayapti.

“Rossiya fuqarosi Markaziy Osiyo fuqarosiga qaraganda ko‘proq maosh olishi kerak. Bu shuni anglatadiki, biz Markaziy osiyoliklarni ishga olgan taqdirda ham maoshini oshirmasligimiz kerak”, – deya so‘zini izohlagan u.

Muammoni hal qilish uchun Yaroshenko Rossiyaga mehnat migrasiyasining oqimini kamaytirishni taklif qildi.

"Birinchidan, mamlakatdan pul olib chiqishga to‘siq qo‘yish, ya'ni Tojikiston, O‘zbekiston, Turkmaniston, Qirg‘iziston fuqarolari va fuqaroligi bo‘lmagan shaxslar uchun o‘z vataniga pul o‘tkazmalari bo‘yicha komissiya joriy etish kerak.

Agar Rossiya bankining mijozi o‘z uyiga pul o‘tkazsa, u o‘tkazma maqsadidan qat’i nazar, summaning 30 foizini komissiya sifatida to‘lashi kerak. Bank bu pulni maxsus federal byudjet jamg‘armasiga o‘tkazadi va shu orqali pullarni Rossiyada saqlashga yordam beradi.

Ayrim hisob-kitoblarga ko‘ra, har yili Markaziy Osiyodan kelgan muhojirlar o‘z vatanlariga bir necha milliard rubl pul o‘tkazib kelgan va bu pullar mamlakatdan tashqariga chiqib ketgan, – degan rossiyalik siyosatshunos.

• Migratsiya
• Rossiya
• Siyosat