Senat raisining birinchi o‘rinbosari Sodiq Safoyev joriy yilning 31 avgust kuni prezident Shavkat Mirziyoyevning qatag‘on qurbonlari xotirasiga bag‘ishlangan marosimdagi nutqiga Rossiya OAVlarida berilgan munosabatlarni “populistik vahima” sifatida baholadi. Safoyev bu haqda “Twitter” sahifasida yozib qoldirgan.

“Prezident Shavkat Mirziyoyevning qatag‘on qurbonlari xotirasiga bag‘ishlangan marosimdagi nutqiga Rossiya OAVlarida berilgan “munosabatlar”ini o‘qib chiqdim.

Mustabid tuzum qatag‘on qurbonlari xotirasini yod etgan O‘zbekiston prezidentining muvozanatli, bosiq va o‘ta samimiy nutqiga mutlaqo noadekvat munosabat. O‘zi munozara nima haqida? Mustabid tuzum shafqasiz va berahm bo‘lganligimi?

Yoki halok bo‘lganlar haqiqatan ham g‘ayriinsoniy qatag‘on qurbonlari bo‘lganligimi? Aqli to‘g‘ri va xotirasi aniq bo‘lgan hech qaysi inson u yoki buni so‘roq qila olmaydi.

Tuzumga qarshi, Vatan ozodligi uchun o‘z ovozini baland ko‘tarishga jur’at etgan minglab yurtdoshlarimiz uchun poligon va qabriston bo‘lib qolgan joyda o‘tgan marosimda men ham qatnashdim. U chin qalbdan, yorug‘ va tantanali, qandaydir samimiy, insoniy tarzda o‘tdi.

Aynan shu joyda jallodlar tomonidan o‘z o‘limini jasorat bilan qabul qilganlar oldidagi qarzimizni insoniy ravishda qaytardik. Bu endi shov-shuvli siyosiylashtirish va populistik vahima uchun sababmi?” – deya yozgan Sodiq Safoyev..

• Bosma OAV
• Qatag‘on
• Rossiya
• Safoyev
• Shavkat Mirziyoyev