Saida Mirziyoyeva Buxoro tumanida zamonaviy va energiyatejamkor talablar asosida rekonstruksiya qilingan 21-sonli MTTning ochilish marosimida ishtirok etdi

Joriy yilning 15-may kuni Prezident Administratsiyasi rahbari Saida Mirziyoyeva Buxoro viloyatiga amalga oshirgan tashrifi chog‘ida ayanchli holga kelib qolgan 21-sonli maktabgacha ta’lim tashkilotini ko‘zdan kechirib, uni ta’mirlash bo‘yicha mas’ullarga tegishli topshiriqlarni bergandi.

Hozirgi kunda ushbu maskanda to‘liq rekonstruksiya natijasida yangi 100 ta yangi o‘rin yaratilib, jami 240 o‘ringa yetkazildi.

Quvonarlisi ta’mirlash ishlari hamda qamrov oshirilishi natijasida hududdagi 3-6 yoshli bolalarni maktabgacha ta’lim bilan qamrab olish 100 foizga (davlat va nodavlat MTTda) yetkazildi.

Qurilishda energiya samaradorligiga alohida e’tibor qaratilib, devorlar bazalt asosidagi issiqlik izolyatsiya materiallari bilan qoplandi.

Shuningdek, muassasaga 40 kVt quvvatli quyosh fotoelektr panellari o‘rnatish rejalashtirilgan. Buning natijasida, yiliga 55-65 ming kVt soat elektr energiyasi ishlab chiqarish va muassasaning elektr energiya xarajatlarini kamaytirish ko‘zda tutilgan.

Bugun viloyatga navbatdagi tashrifi davomida Saida Mirziyoyeva ushbu maskanning ochilish marosimida ishtirok etdi.

Ushbu maskanning qayta foydalanishga topshirilishi nafaqat hududdagi bolajonlar uchun zamonaviy, qulay va xavfsiz ta’lim muhitini yaratdi, balki chekka hududlarda ham ta’lim infratuzilmasini sifat jihatdan yangi bosqichga olib chiqish borasidagi amaliy qadamlarning yaqqol namunasi bo‘ldi.

• Buxoro
• Saida Mirziyoyeva