Samarqand viloyatida voyaga yetmagan qizni o‘g‘irlab ketgan to‘rt kishi jinoiy javobgarlikka tortildi. Ish materiallariga ko‘ra, 1998-yilda tug‘ilgan B.G‘. 2025-yil 6-avgust kuni ertalab tanishlari — U.Z., A.M. va M.M. bilan oldindan til biriktirib, voyaga yetmagan qizni o‘g‘irlab ketgan.

Shu kuni tongda ular A.M. boshqaruvidagi Nexia rusumli mashinada Kattaqo‘rg‘on tumani bo‘ylab ketayotganida yo‘lni kesib o‘tayotgan bir qizni (2011-yilda tug‘ilgan) ko‘rgan. U non sotib olish uchun ko‘chaning narigi tomonidagi do‘konga ketayotgan bo‘lgan.

B.G‘. va U.Z. qizning oldiga borib, uni urib-do‘pposlagan, jismoniy kuch ishlatib, sochlaridan tortgan va avtomashinaga majburlab mindirgan. Kun.uz’ning yozishicha, ushbu shaxslar biroz vaqt o‘tgach, qizni o‘sha joyga qaytarib olib kelgan.

B.G‘. va uning sheriklari sud majlisida o‘z ayblarini to‘liq tan olgan, ammo “xato qilishganini” aytgan. Uning so‘zlariga ko‘ra, avvalgi tunda u do‘stlarini “o‘tirish” uchun to‘plagan. Pivo sotib olgandan so‘ng, ular Narpay kanali bo‘yiga yo‘l olgan va u yerda tong otguncha ichgan.

Tong ota boshlagani sababli U.Z. uyiga qaytishi kerakligini aytdi. A.M. uni uyigacha olib borishini, so‘ng mashinani gaz bilan to‘ldirib olishini aytdi. Biz barchamiz mashinaga o‘tirdik. “Navbahor” mahallasidagi “Azizbek” choyxonasi yonidan o‘tayotganimizda, yo‘lning o‘ng tomonida bizga notanish bir qizni ko‘rib qoldik. Shu payt U.Z.: “Mashinani to‘xtating, bu mening tanishim, tungi klublarda yuradigan qiz”, deb aytdi, — deya ko‘rsatma berdi B.G‘. sudda.

Mast holatda bo‘lgan erkaklar qiz bilan jinsiy aloqa qilishni istagan.

Mashinaga majburan o‘tqazilgan o‘smir qiz yig‘lab, qo‘yib yuborishlarini iltimos qilgan, onasi uni nonga yuborganini aytib, qo‘lidagi 8000 so‘mni ko‘rsatgan. O‘shanda A.M. qizga ular IIB xodimlari ekanini aytgan. “Bir qiz onasini o‘ldirib, qochib ketdi. Shuning uchun biz seni to‘xtatib, mashinaga o‘tqazdik”, – degan u qizga.

B.G‘. U.Z.dan bu o‘sha qiz ekani yoki xato qilgani haqida so‘ragan. U.Z. xato qilganini tasdiqlagan. Shundan so‘ng erkaklar uni olib ketishgan joyiga olib borgan va o‘sha yerda qoldirgan.

Kattaqo‘rg‘on tumani Jinoyat ishlari bo‘yicha sudining 2025-yil 16-dekabrdagi hukmi bilan ular Jinoyat kodeksining 137-moddasi (odam o‘g‘irlash) 2-qismining “a” va “v” bandlarida nazarda tutilgan jinoyatni sodir etganlikda aybdor deb topilgan. B.G‘. 5,5 yilga, M.M., A.M. va U.Z. esa 5 yildan ozodlikdan mahrum qilingan.

2026-yilning 27-yanvar kuni Samarqand viloyat sudi jinoyat ishlari bo‘yicha apellyatsiya instansiyasi jinoyat ishlari bo‘yicha Kattaqo‘rg‘on tuman sudi sudlanuvchi A.M.ga oid qismini o‘zgarishsiz, apellyatsiya shikoyati qanoatlantirilmasdan qoldirish bo‘yicha ajrim qilgan.

• Jinoyat
• Samarqand
• Sud