O‘zbekistonda 2026-yil 1-mart holatiga muomaladagi bank plastik kartalari soni 70 million 951 ming 598 donani tashkil etdi.

Markaziy bank infografikasida qayd etilishicha, mamlakat bo‘yicha 439 ming 462 ta to‘lov terminali hamda 45 ming 311 ta bankomat va infokiosklar faoliyat yuritmoqda.

Yanvar–fevral oylarida to‘lov terminallari orqali tushgan umumiy tushum 82 trillion 925 milliard 646 million so‘mni tashkil etgan. Eng katta tushum Aloqabank hissasiga to‘g‘ri kelib, 10 trillion 389 milliard so‘m qayd etilgan. Undan keyingi o‘rinlarda TBC bank (6 trillion 520 milliard so‘m) va Milliy bank (6 trillion 174 milliard so‘m) joylashgan.

Bank kartalari soni bo‘yicha esa Xalq banki yetakchilik qilmoqda — 11 million 109 mingdan ortiq karta muomalada. Keyingi o‘rinlarda Agrobank (6,6 million), Uzum Bank (6 million) va Ipoteka bank (5,4 million) qayd etilgan. Shuningdek, Anor bank va Hamkorbank’da ham 4 milliondan ortiq kartalar mavjud.

To‘lov terminallari soni bo‘yicha Hamkorbank (59 mingdan ortiq), Milliy bank (42 mingdan ortiq) va Xalq banki (33 mingdan ortiq) yetakchi hisoblanadi. Bankomat va infokiosklar sonida esa Xalq banki (3 mingdan ortiq), Agrobank (1,8 mingga yaqin) va Milliy bank (1 mingdan ortiq) yuqori ko‘rsatkichlarni qayd etgan.

• Bank karta
• Markaziy bank